Aroztegiari ezetz esan dio jende oldeak Iruñean, eta auzipetuen absoluzioa eskatu du
Milaka eta milaka lagun elkartu dira larunbat bazkalondoan Iruñean, Baztango Aroztegiaren makroproiektuari aurkakotasuna adierazteko eta maiatzean epaituko dituzten zazpi auzipetuen absoluzioa eskatzeko. Bideoz grabatu dugu amaiera ekitaldiko hitzartzea [albistearen amaieran].
aurre egingo dieten hedabide independenteak
Hango eta hemengo jendea elkartu da hiri buruzagian goizean goizik. Hala sumatu da kalean eta hala adierazi dute iruindarrek. Askok probestu dute eguna han edo hemen mokadutxoren bat egin eta Iruñea bisitatzeko. Manifestazio nazionala zen deitua, eta hala konplitu da: antolatzaileen esanetan, 18.000 lagun batu dira. Autobus ugari heldu dira Euskal Herriko hainbat txokotatik; besteak beste, lau autobus gutxienez Lapurditik eta Nafarroa Beheretik. Autoak zientoka, orotara.
Norabide bakarra zuela zirudien Taconera parkea gurutzatzen duen pasealekuak. Gaiteroen konpainian, jende oldearen joanak amaigabea zirudien, eta manifestarien iritsierak ez dira amaitu gutxienez 16:15 izan arte. Danbor hotsek abisua emanda abiatu da manifestazioa, paso motelean eta eguzki printza apurren plazerean. Manifestazioaren ilara benetan izan da luzea: Armada etorbidea alderik alde hartu du jendetzak, halaxe ikusi ahal izan da Baluarte jauregian parean geldialditxoa egin duenean manifestazioak. Hor, Bakearen Plazan, Itoizko urtegiaren aurkako solidarioak hartu dituzte gogoan. Pankarta batean honela bistaratu da: Itoitzetik Aroztegirat, desobedientzia zibila.
Jendetsua eta zalapartatsua izan da manifestazioa, batik bat amaiera partera, Gaztelu Plazarako bidea hartuta. Besteak beste, "Aroztegia geldituko dugu", "ez dira zazpi, herri bat gara", "absoluzioa", "lurra, behin saldua, betiko galdua" edota "lurraren defentsa ez da delitua" aldarriak entzun dira, den-dena euskaraz. Afixa txikiagoak ere eraman dituzte norbanako ugarik; bat baino gehiago ikusi da Aroztegia. Pelotazoa leloduna –Baztango alkate ohiaren aurkako salaketa bat baino gehiago ipini zituen makroproiektuaren enpresa sustatzaileak, proiektua "pelotazoa" zela esateagatik, baina absolbituta geratu zen azkenean–.
Sarearen babesa
Euskal Herriko eragile ugarik adierazi dute era bateko edo besteko atxikimendua Baztango Aroztegiko auzian borrokan dabiltzanekiko. Tartean, lurraren defentsan, ingurumenaren alde eta zenbait makroproiekturen aurka ari diren makina bat taldek hartu dute parte manifestazioan, hala nola Erdiz Bizirik, Ostia!, Araba Bizirik, Guggenheimen Stop, Sustrai Erakuntza, AHT Gelditu eta Subflubialik Ez kolektiboek.
Horien aldarriak ere bistaratu dira manifestazioaren lekuren batean baino gehiagotan: esaterako, AHTaren nafar korridorea edota Arabako Miritxako zentral eolikoaren proiektua salatu dituzte.
Oroitarazi dutenez, gainera, laster izanen da Kanboko Marieniako borrokan atxilo harturiko hiru pertsonen aurkako auzia.
"Herri lurrak defendatzea eskatzen dugu"
Gaztelu Plazatik kurba hartu eta Sarasate pasealekuan amaitu da protesta jendetsua. Hasi bezalatsu, danborren eta txalapartaren erritmora. Nafarroako Parlamentuaren parean ipinitako oholtzara igo dira, lehen-lehenik, Olaia Inziarte abeslaria eta Tatxers taldea, Aroztegiko auzipetuentzat propio sorturiko abesti berria jotzera.
Manifestazioa deitu zen unean, berez datorren astean ziren epaitzekoak Baztango Aroztegiko auzian inplikaturiko zazpiak. Baina akusazioak eskatuta, maiatzera atzeratu dute epaiketa. Maiatzaren 19tik 23ra izango da, manifestazioaren amaieran jakinarazi dutenez.
"Talde kriminal" bateko partaide izatea leporatzen diete zazpi pertsonari, Aroztegian hondeamakinak sartu zirenean bertara joan eta kanpaldia egiteagatik, obra egitea galarazteagatik. Orotara 20 urteko kartzela zigorra eta 56.000 euro eskatu dituzte zazpi herritar horientzat. "Aurrekari arrunt larria ezarriko luke Euskal Herriko herri mugimenduentzat. Epaiketa honen bitartez, herri mugimendu osoa kriminalizatu nahi dute", adierazi dute manifestazioaren amaieran.
Irakurketa sakonago bat ere eskaini dute lurren desjabetze eta makroproiektu urbanistiko edo energetikoen ingurukoa: "Lurrak desjabetu, gure hizkuntza eta kultura desagerrarazi eta gure bizitzak kapitalaren menpe jarri nahi dituzten proiektuei buru egiteko, gure kultura, hizkuntza eta herri lurrak defendatzea eta mundu guztiak bizitza bizigarriak edukitzea eskatzen dugu".
Artikuluan aipaturiko abestia, Tatxers talde iruindarrak eta Olaia Inziarte abeslari oronoztarrak eginiko abestia, Aroztegiaren aferaz. Kantuaren ostean letra.
Letra:
Zergatik daude hemen maitia
Ardiz betetako belai berdeak
Eta zergatik ez? Hotela
Ormigoiezko dunak mendi tartean
Txakurren zaunkak gara
Zuen atean
Nor bizi liteke hor baina
Soilik mamuak
Golf makilak hautsi
Lur guzti hau
Baztandarrena da
Ta betirako
Aroztegia
Bizirik egon dadila
Telleritik azpitik jauregira
Kabia
Telleri jauregi
Txabola izkutuak
Belaietako izerdi
tanta bakoitza
Ez dira sartzen
Zuen sakeletan
Ez zaituztegu nahi hemen!
Ez hemen eta inon ez!
Lehengo lepotikan
Buru ezberdinak
Zer bihurtu nahi dute harana
Haien Museoa
Pikutara hilton
Lur guzti hau
Landu dutenentzat
Telleri jauregi
Txabola izkutuak
Belaietako izerdi
tanta bakoitza
Ez dira sartzen
Zuen sakeletan
Ez zaituztegu nahi hemen!
Ez hemen eta inon ez!
Taldeko kideen aurkako eraso matxistak talde osoaren aurkako eraso gisa ulertzen dituela adierazi du Aroztegiko Elkartasun Komiteak. Komiteak salatu duenez, Aroztegiko epaiketara ikusle gisa sartu nahi zuen jendearen zerrendatik "Baztango mutil-dantzari talde... [+]
Aroztegiko epaiketaren akusazioen –fiskaltza eta akusazio partikularra– idazkiak irakurrita, pentsatzekoa zen epaiketan aterako zituztela froga argiagorik, horrekin bakarrik talde kriminalaren akusazioa oso larria baitzen. Ez ba, bost eguneko epaiketa zuzenean... [+]
Fiskalak eta akusazio partikularrak zazpi auzipetuen zigor eskaerak berretsi dituzte, 46 hilabeteko kartzela zigorra eta 56.000 euro enpresei egindako kalteen ordain gisa. Auzipetuen abokatuek absoluzioa eskatu dute. Epailearen eskuetan geratu da erabakia.
Ostegunean auzipetuek deklaratu dute, eta haien adierazpenetatik honakoa laburbildu liteke: Lekarozko plazan edo akanpadan biltzen ziren herritarrek taldean erabakitzen zuten zer egin; oro har, obren eremura joan eta makinen aurrean era pasiboan jarri.
Asteazkenean lau foruzain, bi alkate ohi eta bi kazetari izan dira haien testigantzak ematen. Geroago, amaiera amaigabean, akusazio partikularraren 11 bideo eta albistegi ikusi eta itzuli dira gaztelerara: desobedientzia zibila begien aurrean. Oso luze joan da, luzeegi.
Bigarren ahozko saioan Aroztegiako obren eremuan izan ziren 11 guardia zibilek deklaratu dute asteartean, gehien-gehienak fiskaltzak deituta. Astelehenekoarekin konparatuta azkar joan da dena, eta arras lasaiago. Haien guztien testigantzan zerbait azpimarratu behar bada zera da:... [+]
Goiza epel esnatu da Iruñean, eta Nafarroako Justizia Jauregiaren aurrean epela beroa zen, elkartasunaren beroa. Baztandik hurbildutako Aroztegiko Elkartasun Komiteak karpa jarrita zuen auzitegiaren aurrean eta dozenaka pertsonak haien elkartasuna adierazi diete zazpi... [+]
Aste osoan ARGIAko kazetari bat dedikazio osoz izango da auzitegi barruan gertatzen denaren berri ematen, baita kanpoan Aroztegiko Elkartasun Komiteak auzipetuen absoluzioa eskatzeko antolatutako egitarau zabala jarraitzen ere. Argia.eus-en aurkituko duzue informazio guztia... [+]
Epaiketetan aldeen arteko akordio aukera iritsi daiteke ahozko auzia hasi baino minutu batzuk lehenago. Auzi honetan akusatuek publiko egin dituzte orain arte egondako negoziazio saioak, eta azkena aste honetakoa izan da, ezagutarazi den moduan porrot egin duena. Akordiorik egon... [+]
Hilabeteak dira jada fiskaltza, defentsa eta akusazio partikularra –Palacio de Arozteguia SM– epaiketa ez egiteko negoziatzen ari direla. Bazegoen oinarrizko akordio bat, baina Aroztegiko Elkartasun Komiteak prentsa ohar bidez iragarri du bertan behera gelditu dela.
Euskal Herriko hainbat arlotako 196 pertsona ezagunek Aroztegiako auzipetuen aldeko manifestua aurkeztu dute Iruñean astearte goizean. Errepresioa eta Aroztegiako proiektuak ordezkatzen duen garapen eredua salatu dituzte. Astelehenean hasiko den epaiketa salatzeko ekintzak... [+]
Aroztegiako hirigintza proiektuaren lanak eteteagatik Baztango zazpi herritar epaituko dituzte maiatzaren 19tik 23ra. Auzipetuei elkartasuna adierazi eta beren absoluzioa eskatzeko kanpaldia hasi zuten igandean Elizondoko plazan, larunbatera arte. Aroztegiko Elkartasun... [+]
Baztango zazpi herritar epaituko dituzte maiatzaren 19tik 23ra. Epaiketaren bezperan, Aroztegiko Elkartasun Komiteak zazpi absoluzioa aldarrikatzeko kanpaldia antolatu du, maiatzaren 4tik 10era, Elizondoko Plazan. Askotariko egitaraua osatu dute egunotarako.