ARGIA.eus

2020ko urriaren 26a

Antsoaingo Udal haur-eskolan alaba euskaraz ezin hezi

  • Martxoaren lehenetik martxoaren 15era arte aurrematrikulazio epea zabalik da Iruñerriko haur-eskoletan. Aurreko astean alabaren aurrematrikula egin genuen. Antsoainen egin nahi genuen, bertan bizi baikara, baina Antsoaingo Udal haur-eskolan ez dago euskarazko murgiltze eredurik.

Maria Ilarregi  |  Nestor Esteban @NEScaloni
2018ko martxoaren 13a

Udalarekin batzartu gara eta gaia tratatu dugu. Honek ez digu konponbiderik eman; une honetan haur-eskolan euskara ezagutzeko eskubidea bermatzea ez du lehentasunen artean. Beraz, hurbilen dauzkagun eta Iruñeko Udalarenak diren Txantrea eta Arrotxapea auzoetako euskarazko haur-eskoletan eman behar izan dugu izena.

Iruñean “kanpotarrak” gara, horregatik Iruñekoak diren familiak baino puntu gutxiagorekin abiatuko gara alaba haur-eskola horietan onartua izateko; ez hori bakarrik, onartua izanez gero, Iruñekoak diren familiek baino %25 gehiago ordaindu beharko dugu (82 euro gehiago hilean). Alderantziz, Iruñekoa bazara eta Antsoaingo Udal haur-eskola erdaldunean zure seme-alaba aurrematrikulatzen baduzu, onartua izanez gero, bertakoek ordainduko duten kuota bera ordainduko duzu.

Antsoaingo eta Iruñeko Udalak (“D” ereduaren aldeko matrikulazio kanpainak babesten dituzten udalak), euskarazko hezkuntzaren aldeko apustua egiten ari garen familia antsoaindarrekin era ulergaitzean jokatzen ari dira: Lehenengoak kanpora joatera behartzen gaitu; eta bigarrenak ekonomikoki zigortu, alaba euskaraz hezi nahi izatea luxu bat balitz bezala. Ez da bidezkoa.

Antsoain herriak haur-eskola euskalduna da behingoz behar duena. Bitartean, Antsoain eta Iruñeko Udalek, seme-alabak euskaraz ikastera Antsoaindik kanpo eramatera behartzen gaituzten familioi, kalteak areagotu beharrean, kalteak arinduko dizkiguten neurriak adostu beharko lituzkete.

Horren esperoan, horren alde lanean jarraituko dugu.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Hezkuntza  |  Hizkuntza eskubideak  |  Antsoain

Iritzia kanaletik interesatuko zaizu...


Azkenak
EGILEAK
Argia buletina
Egunaren laburpena
zure e-postan
Eguneraketa berriak daude