Angelun Lur Berriren hiltegi bat blokatu dute Spangheroko langileek
Behikiaren izenez zaldi haragia saltzen zuela eta eskandalua piztu zuen Spanghero enpresaren Castelnaudaryko (Okzitania) usinako langileek Euskal Herrira ekarri dute beren borroka berriro. Hilabete honetan bertan Donapaleuko karriketatik manifestazioa egina zuten, egindako iruzurrak merkatuetan sekulako galerak egin dizkiola eta orain beharginak kanporatzen ari den Spangheroren jabea Amikuzeko Lur Berri arto kooperatiba erraldoia baita. Lur Berriren filialetako beste bat den Arcadieren Angeluko hiltegiaren atarian lotu dira 40 langile okzitaniar.
Spanghero afera zertan den ARGIAk laburbildua zuen "Neoliberalismoaz ikastaro trinkoa" kronikan. Kazeta.infok zabaldu duenez, langileek pankartak zabaldu dituzte honako leloak aldarrikatuz: "Lur Berrik ordaindu behar du" eta "Biktimak: langileak, nork ordaindu behar du? SOS". Uneotan Spanghero likidazio judizialean da eta bere 240 langileek plan sozial bati (birmoldaketa gogor bati) egin behar diote aurre. Lur Berriko kudeatzaileekin zuzenean negoziatzea eskatu dute Angeluko hiltegiaren ateetan.
ELB euskal sindikatuko ordezkaritza batek bisitatu ditu goizean Angelun bildutako langileak, hemengo nekazarien elkartasun mezua emateko. ELBk prentsa ohar batean zabaldu duenez, "Familia hauek katastrofa sozial baten bezperan dira, enpresako buruzagiek ukan dituzten epe laburreko estrategiengatik (buruzagi gehienak Lur Berriko administratzaileak dira). Lur Berriren hautuen biktimak langileak dira; parte gehiena, menturaz denak, langabezian gertatuko da, ekonomikoki aski gaizki den herrialde batean (Arcadie/Lur Berrik 90 langile langabezian ezarri zituen jadanik Castelnaudaryko hiltegiak hestean)".
ELBk aspalditik salatu du Lur Berriko zuzedaritzak elikadurako multinazionalen artean urteotan darabilen estrategia.
Ardogintza borborka dago: mundu mailan gaineskaintza dagoela-eta, iaz milaka litro erosi zituen Jaurlaritzak destilatzeko. Espainiako Gobernuak diruz lagundu zuen mahats berdea lurrera botatzea. Aurten ere antzeko neurriak hasi dira agertzen. Baina nola iritsi gara egoera... [+]
Apirilaren 13an egitarau indartsua prestatu dute Berangoko Otxantegi Herri Lurra proiektuaren II. urteurrena ospatzeko. Apirilaren 18an, aldiz, bigarren desalojo saiakeraren mehatxua izango dute gainean eta herritarrei dei egin diete proiektua defendatzera joateko. Kideetako... [+]