Carmen Alba Espainiako Gobernuak Nafarroan duen ordezkariak larunbaterako –19:00, herriko plaza– Etxarrin deituta dagoen manifestazioa debekatu badu ere, Amnistiaren aldeko eta Errepresioaren aurkako Mugimenduak hura aurrera eramateko asmoa adierazi du: “Mugimendu honentzat manifestazioa egitea beste aukerarik ez da existitzen”, aurreratu dute prentsaurrekoan taldeko bozeramaileek.

“Preso politiko gaixoek bizi duten egoera oso larria da”, azaldu dute manifestazioaren deitzaileek, eta zehaztu dute egoera “espetxe politika hiltzaile baten ondorio dela”. Antolatzaileen esanetan, “Espainiako eta Frantziako estatuek hamarkadak daramatzate preso politikoei xantaia egiten, haien damua lortu asmoz”.

Manifestazioa iragartzeko agerraldian Mont de Marsan, Valence eta Fleuryko espetxeetan protestak egiten ari diren presoei babesa adierazi diete. Baita Etxarrin bertan 18 egun gose greban daramatzaten Fernando Lizeaga eta Joxean Kortadi preso ohiei ere. Gaixo dauden presoen alde ari dira protestan.

Sortuk arbuiatu egin du Espainiako Gobernu ordezkaritzaren erabakia. Zehaztu du “ez duela mugimendu horren estrategiarekin bat egiten”, baina debekua “euskal herritarren mobilizatzeko eskubidearen aurkako erasotzat” jo du.