Altsasuko Alkateari eskutitz irekia AHTari buruz
AHT-Gelditu!-k antolatuta eta Sakana Trenaren Alde plataformak lagunduta bizikleta-martxa egin zen Martzillatik abiatuta Altsasura arte. Hori baliatuta, Sakana Trenaren Alde plataformak gutun irekia zuzentzen dio Altsasuko Udaleko Alkatea den Javier Ollo jaunari.
Otsailaren 14ko Altsasuko Udalaren bilkuran Abiadura Handiko Trenaren gaia aztertu zen eta Geroa Baik aurkeztutako mozioa onartu zen, Javier Ollo jauna alkateak berak defendatu zuena. Mozio horretan, De la Serna ministroak aurkeztutako proiektuarekin bat etorriz, prestazio handiko errei bikoitzeko plataforma berri baten aldeko apustua egiten da, zeinek ibilbide erdiko eta luzeko pertsonen garraiorako eta merkantziendako balioko duen, Europako Oinarrizko Sarearen estandarrak betez. Hori guztia, Euskadin garatutako Euskal-Y-ren ereduari segituz eta Zaragozan dagoenarekin lotura eginez.
Hala ere, logistikan aditutako guztiek onesten dute Abiadura Handiko eredu hori eta merkantzien garraioa bateraezinak direla; alegia, soilik paketeria arinerako izanen litzatekeela baliagarria, abiadura handiak eskatzen dituen baldintza teknikoengatik. Horregatik, frogatuta dago eredu hori ez dela baliagarria merkantziaren garraioari bere oinarrizko zentzuan etorkizuneko irtenbidea emateko.
Beste aldetik, Europako Kontuen Auzitegiak txosten kritikoa eta zorrotza egin du Europan eta, bereziki, Espainiako Estatuan garatzen ari den Abiadura Handiko ereduarekiko. Txosten horren arabera, eredu hori dirutza xahuketa itzela da (oso errentabilitate eskasa, gainkostuak ...), plangintza kaskarrekoa (erabiltzaile gutxi eta kasu askotan tren konbentzionalen abiadura dutenak), eta irizpide politikoei jarraikiz eraikiak eta ez beharrizanei (beste era batera esanda, elitismoa eta ustelkeria). Gainera, aski ezaguna den datu ekonomiko bat da, hain zuzen ere, AHTaren garapena Espainiako Estatuan eragiten ari den milaka milioiko defizita.
Horregatik guztiagatik, Sakana Trenaren Alde plataformatik Altsasuko Alkate jaunari honako hau eskatzen diogu:
1- Ekonomikoki xahutzailea eta sozialki eta ekologikoki suntsitzailea den AHT eredu horren sustapenerako erabili diren garapen ekonomikoa, lurralde kohesioa, ekologia, eta abar, bezalako marketineko azpi-jokozko hitz-hutsalak alde batera utzita, Altsasurako, Sakanarako eta, oro har, Nafarroarako benetako garapen ekonomikoa eta soziala bermatuko dituen tren eredu baten alde argi egin dezala.
2- Egungo trenaren garapena bere gaitasun guztian sustatu dezala (bikoizketa, hirugarren erreia, trazaduraren hobekuntza...) maila altuko zerbitzuak lortzeko eta pertsonen eta merkantzien garraioa ahalbidetuko dituena.
3- Nafarroako Gobernuaren eta Estatuaren aurrean aldarrika dezala Altsasuk Nafarroako trenaren historian izan duen komunikazio gune eta ardatzaren eginkizuna, eskatuz bere hornidura hobetzea eta maila guztietako zerbitzuak areagotzea, bai pertsonentzat, bai merkantzientzat.
Sinatzaileak:
Artikulua Guaixek argitaratu du eta Creative Commons lizentziari esker ekarri dugu.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
José Luis Ábalos, Espainiar Gobernuko Sustapen Ministroa, Gorka Urtaran alkatearekin eta Eusko Jaurlaritzako ordezkari ezberdinekin bilduko da ostegunean, Gasteizen tren lurperatzeari eta Abiadura Handiko Trenari buruz hitz egiteko.
2009ko urtarrilaren 17an, Arabako Urbina kontzeju txikia tiro eremu bihurtu zen. Ertzaintza gogor oldartu zitzaien AHT-ren kontrako manifestariei: dozenaka lagun zauritu eta beste hainbat Espainiako Auzitegi Nazionalaren esku utzi nahi izan zituen. Desobedientzia zibila kriminalizatzeko kapitulu hura Eusko Jaurlaritzako Barne Saileko liburu beltzean geratuko da betiko.
Frantziako Gobernuak lehenetsi du Bordele eta Hendaiaren arteko bidea berritzea, LGV delakoa (abiadura handiko trena) bertatik ibil dadin baino.
Abiadura Handiko Treneko obretan izaten diren heriotzak saihesteko neurriak eskatu zituzten EH Bilduk eta Elkarrekin-Podemosek, ostegunean Eusko Legebiltzarrean egin zen osoko bilkuran. EAJ, PSE eta PPk, aldiz, ikuskaritzak orain arte bezala segitzearen alde egin zuten.
Nafarroako Parlamentuak ez du onartu Abiadura Handiko Trenaren obrak geldiaraztea eskatzeko EH Bilduk aurkeztutako mozioa. Geroa Bai, UPN, PSN eta PPNren ezezko botoa jaso du mozioak; EH Bilduk, Ahal Dugu-k eta Ezkerrak, berriz, babestu egin dute.
Abiadura Handiko Treneko obretan ari zela langile bat hil da Zizurkilen asteartean arratsaldeko 18:30ean. Egun gutxiren buruan obra horretan zendutako bigarren langilea da.
Trenbide baliabideak hobetzea helburu duen proposamena aurkeztu du Sustrai Eraikuntza Fundazioak, Iruñeko Katakrak liburu dendan.
Irailaren 29an izanen da mobilizazioa, Marcilla inguruan AHTren lanak hasitako eremuan.
Frantzian trenbideen monopolioa duen SNCF konpainiak Urruñan AHT proiektuaren bidean dagoen eraikin bat erosi du , 650.000 euroren truke. Operazioak susmoak eta haserrea sorrarazi du abiadura handiko trenaren kontrakoen artean.
Gobernu Delegaritza aurrean elkarretaratzea antolatu dute gaur, abuztuaren 31, 19:30ean. Erriberri eta Azkoien bitartean egin nahi dituzten lanak bertan behera uzteko eskatuko dute.
