El Correo egunkariak jaso duenez, Ertzaintzak igande goizaldean jaso zuen salaketa, eta biktima, 50 bat urteko emakumea, ospitalera eraman behar izan zuten. Eusko Jaurlaritzako Segurtasun Sailak jakinarazi du oraindik ez dutela inor atxilotu, baina Ertzaintza gertatutakoa ikertzen ari dela erasotzailea identifikatzeko.

Getxoko Udalak "edozein erasogatiko gaitzespena eta arbuioa" agertu du eta “eraso sexistarik gabeko jai eta gizartearen alde lan egiteko” konpromisoa berretsi du. Udaleko ordezkariek adierazi dute "berdintasun eta errespetu baloreetan oinarritutako gizartea lortzearen alde” lan egiten dutela, “emakumeak askatasunez eta lasaitasun osoz bizi ahal izateko, bereziki jaietan”.

Marisa Arrue Getxoko PPren bozeramaileak ere gertatutakoa gaitzetsi du, ohar batean. Arrueren ustez “jokabide protokoloak berrikusi behar dira”, eta udalari segurtasun neurri gehiago jartzeko eskatu dio, “horrelakorik berriro ez gertatzeko”.