ARGIA.eus

2020ko abenduaren 03a

Alderdi Moreko Francisco Sagasti da Peruko presidente berria

  • Manuel Merinok dimisioa emanik, bi bozketen bidez hautatu dute Peruko presidente berria. Kongresuan egin dira bozketak eta aldeko 97 boto eta kontrako 26 jaso zituen azaroaren 16an egindako bigarren bozketan Sagastik.

2020ko azaroaren 17a

Peruko Kongresuak bozketa bidez izendatu du Francisco Sagasti presidentetzarako. Alderdi Moreko hautagaiak 97 boto alde eta 26 kontra jaso zituen azaroaren 16an egindako bigarren bozketan. Hori horrela, azaroaren 10ean izendaturiko Manuel Merinoren kargua hartu du Sagastik, azken honek demisioa aurkeztu zuelako.

Bezperan ere egon zen bozketa baina ez zuen inork argiki irabazi, gutxienez 60 kongresukideren babesa beharrezkoa zuelako irabazleak. Rocio Silva Santisteban ezkerreko hautagaia atera zen lehen, baina 52 botorekin. Bigarren bozketa bidez argitu dute beraz lehendakari berriaren aurpegia.

Kongresuko kideek adostu zuten presidente berria Martin Vizcarra kargutik kentzearen aurka bozkatu zuten hemeretzi biltzarkideetako bat izatea, eta Sagasti izan da hautatua. Vizcarrak 2021erako deitu zituen hauteskundeak bermatu beharko lituzke Gobernu berriak ere. Oroit gara Viscarra kargugabetu zuela Kongresuak, gobernatzeko "ezintasun moral iraunkorra" leporaturik, ustelkeriagatik. 105 izan ziren Viscarraren aurka aurkeztutako zentsura-mozio horren aldeko botoak, 19 kontrakoak eta 4 abstentzioak. Kongresuan ordezkaritza duten indar politiko gehienek babestu zuten zentsura-mozioa; Alderdi Morea eta Somos Peruko ordezkari gehienak aurka azaldu baziren ere.

Sagasti Munduko Bankuak arituriko politikaria da.

Krisi politiko eta soziala

Presidente ohiaren kargugabetzeaz geroztik krisi politiko eta soziala areagotu da Perun. Hain zuzen, herritarren babes zabalik gabeko gobernua osatu zuen Merinok, eskuin muturrarekin eta enpresari handiekin harreman estuan. Protesta eta manifestazio bidez adierazi izan dute herritarrek desadostasuna –eta hildakoak eragin dituen errepresioz erantzun die gobernuak–. Bozketen asteburuan ere bi hildako eta ehunka kolpatu eragin ditu errepresioak. NBEk ere deitoratu egin ditu "atxiloketa bidegabeak", "neurrigabeko indarkeria" eta "kazetariek jaso erasoak".

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Nazioartea  |  Politika  |  Peru

Nazioartea kanaletik interesatuko zaizu...





Azkenak
Argia buletina
Egunaren laburpena
zure e-postan
Eguneraketa berriak daude