Naturgas Usurbilgo Udalaren baimenik gabe ari da urratzen erraustegirako gas bidea
Uztailaren 3ko goizean Zubieta eta Usurbil arteko bidea itxi zien Naturgasek, ez bi udal erakunde horiei ez herritarrei inolako jakinarazpenik igorri gabe. Usurbilgo Udaleko Gobernu Batzordeak baimena ukatua dio Naturgasi, "zerbitzu publikoei eta herritarrei pasabidea bermatzeko plana" aurkezteko eskatuz.
Zubietako Herri Batzarraren eta Usurbilgo udalaren eta izenean, bi alkateek, Joxemari Zubimendi eta Xabier Arregi hurrenez hurren, adierazpena irakurri dute, herritarrez inguratuta. Bertan salatu dute erraustegirako, espetxerako eta Eskuzaitzetako industriagunerako gasa sartzeko lanetarako Usurbil eta Zubieta arteko errepidea itxi dutela, ustez bi hilabeterako, eta horren berri ez dietela bi udalei eman. Herritarrek ere ez dutela informaziorik jaso salatu dute eta horrek kalte handia eragin duela euren eguneroko bizimoduan: hainbat zerbitzu bermatzeko (hondakin-bilketa, garraioa, posta...) zailtasuna eragin diela, ohiko bidea itxi dietela eta ez dagoela "inolako planifikaziorik" larrialdiren bat gertatuz gero.
Donostiako Udalaren "nagusikeria" salatu dute
Idatzian azaldu dute Donostiako Udalak "nonbait" baimena eman duela baina Zubieta eta Usurbilgo herritarrak eta udalak kontuan hartu gabe: "Nabarmen utzi du berriz ere begirunea galdua digula zubietarroi eta usurbildarroi. Nagusikeriaz jokatu du ostera ere". Obraren eremuak bi udalerri ukitzen dituela oroitarazi dute: Donostia eta Usurbil.
Usurbilgo Udalak baimena ukatu dio Naturgasi pasabidea bermatzeko plana aurkeztu ezean
Urtarrilaren 31n, "udal teknikarien txostenetan oinarrituta", Usurbilgo Udaleko Gobernu Batzordeak baimena ukatu zion Naturgas Energia Distribución SAU enpresari eta eskatu zion aurkez zezala "zerbitzu publikoak eta herritarrentzako pasabidea bermatzen duen plana". Plan hori ez duela oraindik aurkeztu adierazi du Arregi alkateak. Zerbitzuak bermatzeko plan hori jaso eta "jarri beharreko baldintza eta neurri zuzentzaileak hiru erakundeen artean adostu arte" obrak hasteko baimenik ez emateko eskatu diote Donostiako Udalari, Zubieta eta Usurbilgo udalek. Donostiakoak ez duela erantzun adierazi dute.
Obra geldiarazteko eskatu dute
Zubietako Herri Batzarrak eta Usurbilgo Udalak obra geldiaraztea eskatu dute, "hiru erakundeen arteko irtenbide egokia adostu, eta guztiaren berri herritarrei jakinarazi arte".
Jarraian, Usurbilgo alkate Xabier Arregik salatu du bezperan herritarrek Donostiako udaltzain eta ertzainengandik jaso zuten tratua, herritarrak obretara baimenez galdezka jo zutenean:
Zubietako erraustegi inguruan laginak biltzen bost urte daramatza ToxicoWatch fundazioak, metal astunen, dioxinen, PCBen eta PFASen bila. Horiek guztiak ageri dira laginetan eta gainera kutsaduraren “igoera kezkagarria” aurkitu dutela jakinarazi du Errausketaren... [+]
Eusko Jaurlaritzako Ingurumen sailak ez zuen Artaxoara eramandako hondakinen karakterizazioari buruzko informaziorik; hala dio Eusko Legebiltzarrera igorritako dokumentazioan. Gipuzkoako erraustegia kudeatzen duen Ekondakinek lixibiatuak bidaltzen jarraitu zuen, Ecofert enpresak... [+]
Bilboko Auzo Elkarteen Federazioak komunikatu bat eskaini du Gipuzkoako erraustegiko lixibiatuak Zorrotzara bidaltzeko asmoaren inguruan.
GuraSOS plataformak Zubietako erraustegiarekiko duten jarrera ukatzailea aurpegiratu zieten foru agintariei asteazkenean Gipuzkoako Batzar Nagusietan egindako agerraldian. GuraSOSen bozeramaile eta abokatu Joseba Belaustegik azaldu zuenez, egungo arazoen aurrean beste alde... [+]