“Euskaraz bizi nahi izateagatik” epaitu dituztela esan dute Itziar Claver eta Haizea Ramirez de Alda auzipetuek.

2011ko azaroan, foruzainek identifikatu zituzten, Altsasun, euskarak kaleetan duen presentzia eza salatzeko protesta baten ostean, kaletik oinez zihoazela. 300 euroko isuna jarri zieten poliziek, euskaraz erantzuteagatik. Helegitea jarrita, bertan behera geratu zen isuna.

Handik gutxira ohar bana jaso zuten posta bidez, herriko 16 seinale borratzea leporatzen zieten.

EHEko kide Nestor Estebanek ARGIAri emandako azalpenen arabera, "inolako frogarik gabe" auzipetu dituzte taldeko bi kideak. 16 seinale horietako asko aspaldi ezabatuta zeudela azaldu du. Haren aburuz, epaiketak ez du "ez hanka ez buru". "Pentsa, seinale berbera hiru bider ezabatzea egotzi diete", esan du Estebanek.

Claver auzipetuak egoera salatu du: “Gure herrian enegarren mailako herritar izatera kondenatu gaituzte aspaldi; otzanak, obedienteak izan behar dugu, garena izateagatik zigorrarekin topatu nahi ez badugu”.

Ordaindu dute jada eskatutako kantitatea. Orain, atxiloaldia betetzea baino ez zaie geratzen. Altsasuko Gure Etxea eraikinean pasatuko dituzte bi egunak, protesta gisa.

Azaroaren 23an eta 24an beteko dute zigorra eta herritarrei Gure Etxera hurbiltzeko deia egin diete: “Bi egun horietan euskaraz bizi nahian berretsiko gara eta guztion artean Altsasu zein Euskal Herri osoan euskaraz bizi nahia ozen entzutea lortuko dugu”.

Prentsaurreko baten bidez auzia salatu dute. Epaia euskaldunei ezarritako “lehen zigorra” ez dela azpimarratu, eta azkenengoa ere ez dela izango adierazi dute.

“Kolonialismo garaian”. Halaxe bizi da egun Euskal Herria bi epaituen ustetan. Horregatik, “euskaraz bizi ahal izateko”, lanean “tinko” jarraituko dutela aldarrikatu dute.