337.462 euro 11-13 sumarioko epaiketaren gastuei aurre egiteko
Presoen aldeko lana egiteagatik auzipetutako 47 lagunek epaiketak dakartzan gastuen aurreikuspena jakinarazi du. 337.462 euro orotara, 7.180 auzipetu bakoitzeko. Elkartasun ekonomikoa bideratzeko kontu korrontea zabaldu dute.
Espetxearen mehatxua ez da 11-13 sumarioan auzipetutako pertsonen kezka bakarra irailaren 16an Espainiako Auzitegi Nazionalean hasiko den epaiketari begira. Auzipetuek hiru hilabete eman beharko dituzte Madrilen bizitzen astegunetan. Ohikoan altuak izaten diren gastuak biderkatzea dakar horrek.
Estuasun egoerak
Aurretik ere antzeko egoerei aurre egin dioten euskal herritar asko egon direla gogoratzen dute auzipetuek komunikabideei igorritako prentsa oharrean: “Orain gu gara ataka horretan gaudenak,laguntza eske gatozenak”
Auzipetuetako askok epaiketaren gastuei indibidualki aurre egiteko arazoak izango lituzketela nabarmendu dute ere. “Langileak gara. Hori gutxi ez eta epaiketa honek gure bizitza laboralean ere eragin handia izango duela gauza jakina da. Madrilerako joateko eszedentziak, lizentziak edota opor egunak eskatu beharko ditugu, eta langabezian daudenek arazo handiak edukiko dituzte, hemendik eta epaiketa amaitu arte, soldatapeko lan bat aurkitzeko”.
Gastuen azalpen zehatza
Auzipetuek gastuak atalka banandu eta publiko egitea erabaki dute, zenbatekoaren handia ulertarazteko nahian. Hona eman dituzten datuak: Gastu juridikoa (abokatuak eta prokuradoreak): 236.440 euro; garraioa (auziperatuak, abokatuak, lekukoak): 28.950 euro; estantzia (auziperatuak eta lekukoak): 72.072 euro.
Denera 337.462 euro izan litezke beraz, auzipetu bakoitzeko: 7.180 euro. Ekarpen guztiak “ongi etorriak eta bihotzez eskertuak” izango direla diote.
Martxoaren 1ean ziren ateratzekoak, baina ia hiru aste lehenago geratuko dira aske. Arantza Zulueta Valentziako Picassent espetxean dago egun; Jon Enparantza, berriz, Estremerako kartzelan (Madril).
11/13 makroepaiketako Arantxa Zulueta eta Jon Enparantza auzipetuen espetxeratzeak salatuko dituzte asteazkenean Bilbon, Donostian eta Lekeition deitu dituen mobilizazioetan.
11/13 auzibidean epaileek jarritako zigorrari hasiera eman diote astelehenean. 47ak Herrian plataformak elkarretaratzeak deitu ditu asteazkenean.
11/13 makroepaiketan, 47 auzipetuetako bat da Ibon Meñika bizkaitarra, eta hilabeteotan auzipetuen bozeramaileetako bat izan da. 2013an atxilotu zuten Herrira elkarteko beste zenbait kiderekin batera, eta sei urteren ostean eseri zen Espainiako Auzitegi Nazionaleko... [+]
Astelehen honetako 10:00etan hasi da 47 euskal herritarren aurkako ahozko auzia, baina berehala adierazi dute aldeen arteko akordioa zegoela eta epaiketa eten da.