Espainiako Estatuko 20 pertsona aberatsenen ondarea 115.100 milioi eurokoa zen 2015ean. Dirudun talde horrek Estatuko %30 behartsuenak duen adinako aberastasuna dauka pilatuta, Oxfam elkarteak egindako ikerketa baten arabera. Espainiako Estatuko biztanleen %30a, 13,4 milioi pertsona, pobrezia eta gizarte bazterketa arriskuan dago. Baina desoreka ez da Espainiako gaitza soilik. 62 pertsona aberatsenek 3.600 milioi lagunen aberastasun bera dute munduan, biztanleriaren erdiak adina, alegia.

Bien bitartean, zerga politikek handienei mesede egiten jarraitzen dute. Ikerketa beraren arabera, bildutako 10 eurotik 9 langileen nominatik dator. Euroa baino gutxiago baino ez da biltzen kapitalen errendimendutik. Aldi berean, paradisu fiskaletan egindako inbertsioak gorantz doaz. Munduko hamar enpresa handienetatik bederatzik toki horietan dituzte beren diruak sartuta: zazpi bilioi euro ezkutatzen dituzte bertan. Espainiako Estatuaren kasuan, paradisu fiskaletan inbertituriko kapitala %2.000 igo da azken urteetan.

Egoera horren arduradun diren eta gobernuen politikak baldintzatzen dituzten asko Davosen bildu ziren joan den astean. Luxuaren eta elurraren erdian eztabaidatu dute. Ez ordea sistema kapitalista aldatzeko, makillatzeko baizik, euren politikek eta sistema neoliberalak ekarriko dituzten desoreka handiagoek eta langabeziak sorturiko ezegonkortasuna saihestearren. Gizarte hau eta sistema hau aldatzeko, elkartasunaz gain, gehiengoaren zerbitzura dauden gobernuak behar dira, politika ekonomiko eta sozial antikapitalistak bultzako dituzten ordezkariak. Has daitezke, adibidez, paradisu fiskalak ezabatzen eta horiek erabiltzen dituztenak pertsegitzen.