Ikerketa Japoniako irla batzuetan garatu dute. Irletako batean oso apo gutxi dago; beste batean, berriz, erruz aurki daitezke. Era berean irla horietako sugeen pozoi-maila ere oso desberdina da batean eta bestean; eta portaera ere desberdina da. Pozoi gutxi duten ofidioek pozoi asko dutenek baino azkarrago egiten dute ihes arriskua sumatzen dutenean. Apoengandik beneno dezente hartutako sugeek arriskuei aurre egiteko joera handiagoa dute.

Oso salamandra aurreratua

Bordeleko (Frantzia) unibertsitateko Jean Marie Cabelguen eta Lausanako (Suitza) Institutu Politeknikoko Jan Auke Ijspeert ikerlariak Salamandra robotica deitzen dena sortu dute orain milioika urte uretik lehorrera igaro ziren izakien nondik norakoak hobeto ulertu nahian. Probak Genevako lakuan egiten ari dira eta eraikitako robotak sare neuronal konplexu bat du bere baitan.
 
Robotak era batera mugitzen ditu bere gorputz atalak uretan eta lehorrean beste era batera. Baina ikerketaren helburua uretatik lehorrera igarotzean salamandraren mugitzeko moduaren transformazioa aztertzea da.
 
Gorputzaren mugimenduek muskulu batzuk besteak baino gehiago garatzea dakar, ezinbestean. Prozesu horren ezaugarriez jabetuta hobeto ulertu ahal izango dira lehorreratu diren animaliek hartu dituzten itxurak eta portaerak.