Pentsatu dut


2023ko otsailaren 26an
'Hitz esana' | NOR: Mejillontigre kolektiboa | NOIZ: Urtarrilaren 20an | NON:  Laba (Iruñea)
'Hitz esana' | NOR: Mejillontigre kolektiboa | NOIZ: Urtarrilaren 20an | NON: Laba (Iruñea)

Hitz esana ikusi ostean, kronika horrela idaztea pentsatu dut. Pentsatu dut, Zergatik [pausa] errezitatu [pausa] behar [pausa] dira [pausa] poemak [pausa] horrela? Nik ere esan diet lagunei banoa poesia-errezitaldi batera. Eta haiek ere esan didate uf, ez dut ulertzen poesia. Txakrak eta begiak eta ez direnak zabaldu dizkidate eta asko pentsatu dut futbolariek estadioak betetzeko duten gaitasunaz. Pentsatu dut, edo hobe esanda, pentsarazi didate nik eta nire metro laurogeiak molestatzen dugula metro hirurogeikoa kontzertuetan, baina ni ere jartzen naizela beti altuenaren alboan. Pajak egiten dituzten musikariak imajinatu ditut, eta etxez aldatzen ari denaren azalean jarri naiz. Ikeako armairu bat, Ikeako ohe bat, Ikeako lanpara bat, Ikeako estorea eta Ikeako beste txorakeria pila bat ditudan honek touché pentsatu du. Eta haserre irakurtzea ere normala dela 10, 9, 8, 7, 6 urteko haurrari egindako abusua 5, 4, 3, txin-txin 2, 1… irakurri duenean. Nik ere bilatu dut looperraren izena Interneten zeren ze ostia da looper bat eta ikusi dut ahotsarekin jolasteko erabili dutena dela. Odoleztatuta dagoen Agate Deunari buruz ari zirenean pentsatu dut zein ausarta izan behar den hau egiteko, poesia egiteagatik bakarrik ez, poesia horrela egiteagatik. Ni ere ez naiz tarot zalea, fededuna, sineskerietan ibiltzekoa, eta sinetsi nahi nuke baina ez dakit zertan. Eta katurik ere ez dut, baina pentsatu dut agian beharko nukeela bat, hutsune horiek betetzeko eta kontrolatzeko norbait izan dezadan. Sabrina Spellmanekin oroitzapenak desblokeatu dizkidate eta nor da nire Sabrina pentsatu dut, nor ezagutu nahi nuke? Nor izango zen erabateko dezepzio bat nire erreferenteen artean? Pasaiako badiatik ikusten diren auto guztiak ez dira kabitzen begirada batean, ezta 2.000 karaktere hauetan ere pentsatu dudan guztia. Eta berriz touché, parent(h)esiak erabili zalea izan naizelako ni ere, baina tira, denok egin dugu. Etorkizuneko haurrarengan pentsatu dut, ikusi beharko baitu munduan badela jende zitala, bolleroa, zerria, kanibala, perfektua eta beste ehunka motatakoa. Pum egin dit zerbaitek barruan, ez baitago gauzak egiteko modu bakarra. Mesedez, segi #PoetryToThePeople egiten eta josten. Horrelako gehiago behar dira.


Kanal honetatik interesatuko zaizu: Kontzertuak
Zuzeneko kronika
Behin baziren baionar batzuk...

Willis Drummonden agur besta

Non: Intxaurrondoko kultur etxean, Donostian

Noiz: Urtarrilaren 5ean

Gonbidatuak: Zetkin, Elvis Caino DJ, Indezen DJ eta Zumitrenko DJ.

------------------------------------------------

... esango dugu noizbait. Joan ikustera, baina... [+]


Eguneraketa berriak daude