Emakumeen lana ikus-entzuteko beharraz

  • Lekeitioko 39. Zine Bileraren barruan, urriaren 22an (H)emen-Her(e) plataformak antolatu zuen mahai-ingurua eta bertako Kristina Zoritak moderatu. Beraien bizipenetatik aritu ziren Amara Mosteiro, Izibene Oñederra, Nahia Laka eta Eneko Sagardoy.

Ale Goikoetxea

Europan ekoizten diren filmen %21a baino ez dira emakumezkoek zuzendutakoak; datu horrekin eman dio hasiera Kristina Zoritak emakumea eta ikus-entzunezkoei buruzko mahai-inguruari Lekeitioko Zine Bileran. Aipatutako datua Europako sei herrialdetan egindako inkesta batean eskuratutakoa da. Finantzazioaren %84a ere gizonezkoek zuzendutako filmetara bideratzen da ikerketa honen arabera, zine eskoletan ikasleen erdiak emakumezkoak diren arren. Datuak datu, egun ikus-entzunezkoen arloan diharduten emakumeak gerizatik atera eta erreferente bilakatzeko premia azpimarratu dute beraien bizipenak elkarbanatzera gonbidatutako hizlariek.
    Amara Mosteiro Euskal Herriko Zinema eskolako irakaslea, Izibene Oñederra Arte Ederretan doktorea eta animaziozko filmen egilea, Nahia Laka ikasketak eta praktiken osteko lanaldia bukatu berria, eta emakume hauen artean Eneko Sagardoy aktorea. Azken hau, hanka puntetan gerturatu da, gizonezkoa izanik, bere burua boteredunen taldean kokatzen duelako eta beraz, berba egitera baino entzutera gerturatu dela adierazi du.
    Eusko Jaurlaritza burutzen ari den ikerketak dio ikus-entzunezkoak ekoizten dituzten enpresetako lau arduradunetatik bakarra dela emakumezkoa. Datu horrek ez du sorpresaz harrapatu Mosteiro. Bere lankideen artean “la mujer eléctrico” moduan ezagutzen zutela du gogoan, eta bere lan esparruan etengabe argazkilaritzarako duen gaitasuna erakutsi beharraz mintzatu da. Laka ostera, hasiberria denez, itxaropentsuago agertu da: oraindik sektorea norabidez aldatu eta emakumeek bere lekua egingo dutela dio. Gainera, apurka bada ere aldaketa ematen ari dela aipatu dute bertaratutakoek, baina hori behar den moduan gertatzeko emakumeen lana bistaratzearen garrantzia azpimarratu dute, ondorengoek emakumezko erreferenteak izatea ezinbestekoa delako.
    Emakumeei zuzendutako laguntzen artean gutxieneko kuota batzuk bermatu behar diren edo ez sortu da eztabaida. Laguntzak izenik gabeko proiektuetara zuzendu behar direla esan du Mosteirok, emakume zein gizonezkoak pareko. Entzuleen artean, aldiz, kontrako iritzia gailendu da, abiapuntu ezberdinetatik abiatzen garen bitartean, gutxieneko bat behintzat emakumeek egindako lanetara bideratu beharra dagoela esan dute, gutxienez pareko izango garen egoera idiliko horretara iritsi bitartean.
    Erakundeei sentsibilitatea eskatu diete, eta kulturan inbertitzen den diruak eman ditzakeen etekinei gutxiago erreparatzea: “Garraio publikoak ez du etekin ekonomikorik ematen eta inork ez du arlo horretan diru publikoa inbertitzea zalantzan ipintzen” kexatu da Sagardoy. Baina Oñederrak gogora ekarri du erakundeak gizartearen isla direla. Eta ni neu, ados nago azken aipu horrekin. Izan ere, entzule gisa batu garen hamar lagunen kezkak nekez irauliko du ikus-entzunezkoen egungo panorama maskulinoa.

39. Zine Bilerak saritutako filmak:
- Film eta ekoizpen onena profesional mailan: N’Diawaldy Bouly (Natxo Leuzak zuzendua).
- Film eta gidoi onena amateur mailan: Karta astrala (Maite Bidarte eta Koldo Garcíak zuzendua).
- Antzar Morea saria, genero ikuspegia ongien landu duen filmari: Beti bezperako koplak (Ageda Kopla taldeak zuzendua).
- Saritutako beste filmak: Xinta Dantza; Hasiera; 280º eta Korronteari aurre. Euskal balezaleak Islandian.


ASTEKARIA
2016ko urriaren 30a
Azoka
Kanal honetatik interesatuko zaizu: Euskal Zine Bilera
2020-11-30 | ARGIA
Urrezko Antzarra Bego Vicarioren 'Ehiza' filmarentzat izan da Euskal Zine Bileran

Euskal Zine Bilerako Lehiaketan hemeretzi filmak hartu dute parte eta azaroaren 23tik 26ra bitartean ikusi ahal izan dira zinebilera.eus webgunean. Bego Vicarioren filma izan da onena. Urrezko Antzarra eta 1.900 euroko saria jaso ditu.

 


Maider Oleagaren 'Verabredung': Berlinen gurutzatzen diren historiak

Verabredung filmaren kritika. Zuzendaria: Maider Oleaga. Urriaren 6an Lekeitioko zinema aretoan eman zuten, 41. Euskal Zine Bileraren irekiera ekitaldian.


2018-10-04 | ARGIA
Transformatuta abiatuko du 41. edizioa Lekeitioko Euskal Zine Bilerak

Indarberrituta hasiko da Lekeitioko Euskal Zine Bilera larunbat honetan: iaz 40. Urteurrena bete ondoren, 40+1 edizioan “Euskal Herrian euskaraz egiten den zine bileraren berrinterpretazioa” prestatu dutela iragarri dute antolatzaileek. Urriaren 6tik 12ra bitartean... [+]


2018-08-28 | Nahia Ibarzabal
Fuchs eta Castagneten "Non" filma estreinatuko da Hego Euskal Herrian

Okzitaniako Capdenac hirian Radial enpresak ateak itxi zituen greba baten ondoren. Langileen kexa sumindua kontatzen du Eñaut Castagnet eta Ximun Fuchs zuzendarien lanak.


"Jane, Tarzan ez zen horren guay" eta "Zulo" filmak garaile Euskal Zine Bileran

40. edizioa agurtu berri du Lekeitioko Euskal Zine Bilerak. Film onenaren saria Begoña Vicarioren Jane, Tarzan ez zen horren guay lanak lortu du profesional mailan eta Amancay Gaztañaga eta Erika Olaizolaren Zulo filmak amateur mailan.


Eguneraketa berriak daude