Maider Oleagaren 'Verabredung': Berlinen gurutzatzen diren historiak

  • Verabredung filmaren kritika. Zuzendaria: Maider Oleaga. Urriaren 6an Lekeitioko zinema aretoan eman zuten, 41. Euskal Zine Bileraren irekiera ekitaldian.

Ainhoa Gutiérrez del Pozo
2018ko urriaren 09a

Irekiera ekitaldiak zabaldutako atetik sartu da Maider Oleagaren Verabredung (2017) film luzea Lekeitioko zinema aretora, (H)emen gaude sailak zinemagile bilbotarrarengan fokua jarri duen 41. Euskal Zine Bilerako edizio honetan. Oleagak urte amaieran estreinatuko du Elbira Zipitriaren inguruan egindako Muga deitzen da pausoa dokumentala.

Oleagak 2016an zuzendutako Iragan gunea Berlin filmaren ondorengotza darama Verabredung-ek, eta bertan, hiriburu alemaniarraren inguruko hausnarketa proposatzen du zuzendariak, gaur egun Berlingo hainbat hiritarren bizitzetan arakatuta. 1941ean, Jose Antonio Agirre lehen lehendakariak Berlin izan zuen tarte baterako gordeleku, erbestean igaro zituen urteetan. 2016an, bere bizitza berreraikitzea helburu duen jende andana bertaratzen da, oraindik, hiri honetara. Bi errealitate hauek tartekatzen ditu Oleagak filmean, Berlingo iruditegia osatzen duten paisaien baitan.

Bost pertsonek gorpuztu dituzte Verabredung (Hitzordua) filmaren ahotsak: sorterria berreraikitzea amets duen siriar errefuxiatuak, bere burua familia eta jaio den kulturako kode sozialetatik at bizitzera behartua ikusi duen emakume kurduak, hala nola, musika eta artearen baitan mugitzen diren hiru euskaldunek: klarinete-jolea, artista plastikoa eta orkestra zuzendaria. Gazte hauen eguneroko bizitzaren zatiak elkarren artean jostean sortzen ditu Oleagak hiriaren inguruko ikuspegi anitzak, Agirre lehendakariaren egunerokoaren pasarteekin lotuta. De Guernica a Nueva York, pasando por Berlín (1942) liburutik jasotako aipuak erabiltzen ditu, non hamazazpi hilabetean lehendakariak egunez egun idatzitakoak gordetzen diren, panpin baten barnean ezkutatuta egonagatik galdu ez zirenak. Aipuok gazteei hiriak sortzen dizkien hausnarketekin elkarrizketan jartzen ditu, eta hiria hizpide duten iritzi berdin eta ezberdinen arteko mapa eraikitzen du horrela bilbotarrak, gogoeta gisa.

Pertsonaia bakoitzaren istorioa bere modura harremantzen da hiria eta lehendakariaren ibilbidearekin. Siriarra Berlinen erbesteratu da gerratik ihesi, eta hirian aurkitu du Bigarren Mundu Gerran suntsitua izan ostean gaur egun berreraikia azaltzen den Berlin berria. Bertan gonbidatu izan nahi du, eta ez errefuxiatu. Kurduak hirian bilatu ditu bere burua berregiteko beharrezkoak zituen tresnak. Beste hizkuntza bat, beste bizitza bat, beste nortasun bat. Klarinete-jolea, hain zuzen, hori galdu izanak pentsarazten du. Behin hiri horretara heldu ondorengo hura ezin utzia islatzen du, eta bertan bere burua aurkitu nahia. Artista plastikoak sakonera eramaten duen hiria deskribatzen du, non ezin den ezer espero, dena oreka prekarioan dantzan baitago. Inguruko jendearekiko anonimotasuna nabarmentzen du berak, reset modukoa. Orkestra zuzendaria horrek du batez ere erakartzen, erabateko anonimotasunak, eta ingurukoen mugimendu biziaz mintzo da. Harremanen hauskortasuna dakar, bestalde, elkarren ondotik igarotzeko modu horrek.

Berlin hiriko irudi eta sinboloek, eta klarinete eta pianoz sorturiko melodiek, hainbat hausnarketa eragin dituzte zinema aretoan. Kanpokoaren inguruan (Berlin), gure ingurukotzat dugunaren baitan (etxea), desiratzen dugunarekiko (eskuraezin) edo bilatzen ditugunen bizkarrean (hemen).

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Euskal Zine Bilera  |  Alemania  |  Lekeitio

Euskal Zine Bilera kanaletik interesatuko zaizu...
2018-10-04 | ARGIA
Transformatuta abiatuko du 41. edizioa Lekeitioko Euskal Zine Bilerak

Indarberrituta hasiko da Lekeitioko Euskal Zine Bilera larunbat honetan: iaz 40. Urteurrena bete ondoren, 40+1 edizioan “Euskal Herrian euskaraz egiten den zine bileraren berrinterpretazioa” prestatu dutela iragarri dute antolatzaileek. Urriaren 6tik 12ra bitartean ospatuko da.


2018-08-28 | Nahia Ibarzabal
Fuchs eta Castagneten "Non" filma estreinatuko da Hego Euskal Herrian

Okzitaniako Capdenac hirian Radial enpresak ateak itxi zituen greba baten ondoren. Langileen kexa sumindua kontatzen du Eñaut Castagnet eta Ximun Fuchs zuzendarien lanak.


"Jane, Tarzan ez zen horren guay" eta "Zulo" filmak garaile Euskal Zine Bileran

40. edizioa agurtu berri du Lekeitioko Euskal Zine Bilerak. Film onenaren saria Begoña Vicarioren Jane, Tarzan ez zen horren guay lanak lortu du profesional mailan eta Amancay Gaztañaga eta Erika Olaizolaren Zulo filmak amateur mailan.


"Emakumeak euskal ikusentzunezkoetan" mahai-ingurua
Emakumeen lana ikus-entzuteko beharraz

Lekeitioko 39. Zine Bileraren barruan, urriaren 22an (H)emen-Her(e) plataformak antolatu zuen mahai-ingurua eta bertako Kristina Zoritak moderatu. Beraien bizipenetatik aritu ziren Amara Mosteiro, Izibene Oñederra, Nahia Laka eta Eneko Sagardoy.


Azkenak
EGILEA
Eguneraketa berriak daude