ARGIA.eus

2020ko urriaren 30a

Azeri dantza


Jose Ignazio Ansorena
2014ko uztailaren 27a

Gure ama hil berriaren pazientziari zor diot txistulari bihurtu izana. Etxeko eta inguruko guztiei egin zizkigun erregalia ugariren artean –bere bizitza osoa oparia izan baitzen– bizimodu bilakatu zaidanaren karra piztu zidan.

Geroago, txistulari hastapenetan, aitonaren eskutik ttunttunero zahar asko ezagutu nituen. Misteriozko zerbait zerien euren doinuei: errespetua, herri xehearen jakintzari begirunea. Erabakita zeuden irmo plantatzen horren aurka ari zirenen aurrean. Ez da txatxukeria txistulari izatea.

Azeri dantza Hernaniko festen dantza ikurra da. Bertako bi txistulari taldeak eredu dira inguruko danbolinteroentzat. Herriak dituen behar guztiei ongi erantzuten diete, eskuarki musu-truk, eta arduraz zaintzen dute dagokien ondare kulturala.

San Juan egunean bi taldeak elkartzen dira aspaldiko urteetan Kontzertu berezia jotzera eta goiza beteta izaten dute. 2013an guraso batzuei bururatu zitzaien Azeri dantza haurrentzako moldean ere egin behar zela eta  antolatzeari ekin. Egun horretako goiza aukeratu zuten, ordea, txistularien usadio eta iritziari erreparatu gabe.

Haur Azeri dantzaren antolatzaileek, sortutako ika-mikaren ondoren, txistularien dimisioa eskatu dute. Ez dakite zertaz ari diren.

1977. urtean Donostiako Aste Nagusiaren lehen egunean txistularien Kontzertu Nagusia egin behar genuen Konstituzio Plazan. Egun eta ordu berean antolatua zuten Askatasunaren Ibilaldiaren amaiera ekitaldia Donostiako Trinitate Plazan.

Horren antolatzaileak, azken momentuan, konturatu ziren Trinitate Plaza ez zela leku egokia, poliziak eraso egitea erabakiz gero, hura tranpa bihur zitekeela. Eta eguerdian etorri zitzaizkigun esanez gure emanaldia atzeratu behar genuela. Ezetz esan genien, eurena atzeratzea zela bidezkoena. Berehala hasi zitzaizkigun demandan. Eskerrak Telesforo Monzon agertu eta txistularienganako errespetua eskatu zien. Hark lortu zuen beren ekitaldia laburtzea (hiru ordu laurden), baina gurea atzeratu behar izan zen oholtza hartu egin zigutelako. Horraino iritsi zen errespetua.

Tankera horretakoak maiz izan ditugu txistulariok polizia frankistarekin, ia alderdi politiko guztiekin, neurririk gabeko saltzaile eta tabernariekin, elizarekin... Beste txapelketa batean lehiatzen gara, ez azerienean.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Musika

Iritzia kanaletik interesatuko zaizu...


ASTEKARIA
2014ko uztailaren 27a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude