Aitor izeneko erabiltzaileak atera du gaia, alegia, zer iruditzen zaion jendeari Euskal Autonomia Erkidegoko lehendakariak euskara informala edo “herrikoia” erabiltzea. Hainbatek egin du hausnarketa Aitorren gogoetaz. Lehendakariak hurbiltasuna eta naturaltasuna transmititzen duela uste du Aitorrek, baina era berean, galdetzen du ea Espainiako presidente Zapaterok “hemos aprobau en el Parlamento...” esatea onargarria irudituko litzaigukeen.

Gipuzkera darabilela ere esan du norbaitek –batzuek gipuzkera den zalantzan jarri dute– eta galdetzen dute zergatik aukeratu duen berea ez den euskalkia. Beste batek dio batua erabiltzearen lotsaz –euskaldun berriaren sindromea–, euskaldunago egiteko, jo duela euskalkira.

Gune formaletan Ibarretxek hizkera informal hori ez erabiltzearen alde batek baino gehiagok egin du Sustatuko erantzunetan, baina bateren batek adierazi du ez dagoela ahozko euskara eta gaztelania konparatzerik normalizazioari dagokionez. Beste erabiltzaile bat Unai Ziarreta EAko presidentearen euskara ortopedikoaz kexu da eta jaioterriko hizkeran, Mungiakoan alegia, hitz egitea gomendatzen dio.