Autodeterminazioa lortze bidean, "proposamen demokratiko baten pean gehiengo sozial garrantzitsu bat baldin badaukagu" ez dugula  oztoporik aurkituko esan zuen Ibarretxek. Aukera paregabe baten aurrean gaudela, eta elkarlanerako deia egin zuen, gehiengo batengana iritsi ahal izateko proiektu bateratu bat egitea proposatuz.

Normalizazio politikoaren prozesuari dagokionez, kontu honetan aurrera egingo bada egun daukagun negoziazio kontzeptua (ETA-Espainiako Gobernua) aldatu beharko dela azpimarratu zuen. "Etorkizunean negoziazioak euskal alderdien artean egin behar dira, indarkeria eta gatazka politikoa ongi bereiztuz".

Erabakitzeko eskubideaz ere mintzatu zen lehendakari ohia, eta borroka armatuaren amaiera, biktima guztiei babesa ematea eta "giza eskubide guztiak hiritar guztiei" aitortzea beharrezko baldintza jo zituen.

Entzuleen galderei erantzunez, Espainiako Justiziaz mintzatu zen. Gaur egun, auzitegietan politika "infiltratuta" dagoela gaitzetsi zuen. "Espainiako lege gorena Konstituzioa da, baina bere interpretazioa PPk eta PSOEk aukeratutako epaileen eskuetan dago".

Bestalde, PP Espainiako Gobernura iritsiz gero Bildu ilegalizatzeko arriskuaz galdeginda, zera adierazi zuen: "PPk hauteskundeak irabazten baditu bake prozesua interesatuko zaio".

Azkenik, entzuleren batek politikara itzuli zedila eskatu zionean, ezezkoa berretsi zuen Ibarretxek.