Defentsak arrazoitu zuen ez dagoela loturarik akusazioan aipatzen diren egitateen eta ustezko delituen artean, hasteko eta behin. Horren harira nabarmendu zuen, halaber, aipatutako egitateak auzi nagusian epaitu zirela, eta leporatzen zitzaiena ez zela frogatutzat eman –esan nahi baita, ETAren eta Egunkaria-ren arteko ustezko lotura ekonomikoa–. Delitua egon izan balitz, honez gero preskribituta legokeela ere azaldu zuen, bestalde. Orain epailearen esku dago hori hala den edo ez ebaztea.

Epaiketa abiatu edo ez aztertzeko jendaurrean eginiko saio honetan Joxe Mari Sors, Mikel Sorozabal, Fernando Furundarena, Ainhoa Albisu, Begoña Zubeltzu, Juan Mari Torrealdai, Iñaki Uria eta Txema Auzmendi eseri ziren Gipuzkoako Lurralde Auzitegiko Akusatuen aulkian, martxoaren 7an, Donostian. Gogora dezagun azken hirurak auzi nagusian epaitu eta absolbitu zituztela. Egunkaria-ren 1998-2001 urteetako diru kontuak faltsutzea eta diru-laguntzak eskuratzeko iruzurraren akusaziopean, 128 urteko espetxealdia eta 221 milioi euroko isuna eskatu ditu fiskaltzak zortzientzat.

Dignidad y Justicia elkarteak ezin izango du auzian parte hartu, epaitu beharrekoa  “delitu terroristekin” zerikusirik ez duela ebatzi baitzuen Gipuzkoako auzitegiak 2011n. Nolanahi ere, fiskaltzak mantendu egin ditu elkartearen akusazioak, baita horietara heltzeko baliatu den “kontakizuna” ere, defentsak salatu duenez. Akusazioen artean bakarra utzi du bazterrean: 2000 eta 2001eko BEZAren gaineko iruzurrarena.

Auziaren kronologia eta Jakes Goikoetxearen analisia, Berria-n.