ARGIA.eus

2020ko maiatzaren 26a

XXV. Rikardo Arregi Kazetaritza sariak banatu dira

  • Sari Nagusia Berriak Joko Olinpiarrei egindako jarraipenak jaso du. Ainara Argoitiak Barren aldizkarian egindako bost artikuluk merezi izan dute Sari Berezia. Kazetari Berriaren saria Alex Gurrutxagak Berria egunkarian egindako literatur kritikak nabarmendu ditu. Horiez gain hiru sari berezi banatu dituzte: Ohorezko Aipamen Berezia Euskalerria Irratiak eta Berriak jaso dute eta Aipamen Berezia Lander Arbelaitzek, ARGIAn Donostiako Herri Harresiari egindako jarraipenagatik. Arbelaitzek jasotako sariari buruz idatzi du Xabier Letonak blogean.

Estitxu Eizagirre @eeizagirre
2013ko ekainaren 29a
Saridunak, Cristina Uriarte eta Ana Karrere, Andoaingo ekialdian.

Ekitaldi berezian eman dira 25.nez Rikardo Arregi kazetaritza sariak. Kike Amonarrizek umorez eta goxotasunez gidaturik, Rikardo Arregiren lana presente izan da, sarien ibilbidea erakutsi duen bideoan eta Zeruko Argian idatzi zituen artikuluen pasarte irakurrietan. Familiaren izenean Joseba Arregik anaiaren alde ideologikoa ekarri du gogora, "bai baitira hiltzeko beste hainbat bide. Ahazturik geratzea, adibidez". Duela 25 urte sari hau abiarazi zuten andoaindarrak eskertu ditu Ana Karrere alkateak, "aitortu zutelako euskarazko hedabideak estrategikoak direla". Cristina Uriarte Eusko Jaurlaritzako Hezkuntza, Hizkuntz Politika eta Kultura sailburuak nabarmendu du euskarazko hedabideek "euskararen mundura gizatalde berriak erakartzen" egiten duten lana. "Ez gaitezen autokonplazentzian eror", ohartarazi ondoren "ziur helburuak lortzen lan egingo duzuela. Ondoan izango gaituzue etorkizunean" esanaz itxi du ekitaldia. Hona irabazleen hitzak:

Ohorezko Aipamen Bereziak: Euskalerria Irratia eta Berria

Ainara Rodriguez Andoaingo alkate ordeak eta Arantza Aguado euskara teknikariak eman dituzte sariok, eta bi hedabideen bikaintasuna azpimarratu dute. Euskalerria irratiko zuzendari Mikel Bujandak eta Amaia Lasak jaso dute saria eta Bujandak oroitarazi du 25 urte daramatela "aproba fasean, modu probisionalean, emititzeko baimena noizbait iritsiko delakoan". Martxelo Otamendi Berriako zuzendariak saria jasotakoan ETAk Andoainen Lopez Lacalle hil zuenekoa izan du gogoan, "igual profesionalegi jokatu nuen eta ez nintzen gehiegi hurbildu tragedia sufritu zutenengana". Memoria osatzeko garaiotan medio bakoitzak ere bere iragana aztertzeko lana egin beharra azaldu zuen. "Nire ustez erabat auzi injustuagatik kartzelan dauden" Egin egunkariko zuzendaritzako kideak ere ekarri zituen gogora, eta hauek askatzeaz gain Egunkariaren auzi ekonomikoa itxi dadila desiratu zuen. Cristina Uriarte sailburuari elkarrizketa bat eskatzeko baliatu zuen aukera.

Aipamen Berezia: Lander Arbelaitz

Idurre Eskisabel epaimahai kideak Arbelaitzen jarrera nabarmendu zuen: "informatzeko konpromisoa erakutsi zuen, bere burua arriskuan jartzeraino" eta agentzien menpeko den bulego kazetaritzaren aurrean bertatik zorroztasunez eta minutuz minutu berri ematen egindako lana azpimarratu zuen. Arbelaitzek Herri Harresitik irakaspen hau partekatu zuen "Hedabide txikiok argi izan behar dugu handiek hainbat gairekin beste aldera begiratzen dutenean, aukera zabaltzen zaigula, jendearen jakin mina ase eta gure lana ezagutarazteko". Ertzaintzarekin izandako aurrez aurrekoa ez errepikatzea eskatu zuen "kazetariok erabaki behar dugu non noiz kokatu eta zergatik, beti ere euren lana oztopatzen ez dugun bitartean". Argiako lantalde osoari eskaini zion saria eta aipamen berezia egin zion Xabier Letona zuzendariari, kazetari gazteekin izandako konfiantzagatik.

Kazetari Berria: Alex Gurrutxaga

Joxe Rojas epaimahai kideak literatur kritika hauetan egilearen kokapena estimatu zuen "errespetuzkoa da irakurleekiko, ez da hauen gainetik jartzen. Idazleekiko enpatia erakusten du eta iritzi mailan dabilela argi utziz beti". Gurrutxagak gogoeta bat eskaini zuen: "Politikariek diote herria babesten dutela. Herria lehenbizi buruan eraiki behar da, kontzientziatik. Eta hori kulturatik egiten da, adibidez, kazetaritzatik".

Sari Berezia: Ainara Argoitia

Beatriz Zabalondo epaimahai kideak "36ko gerra elgoibartarren ahotan" artikulua nabarmendu zuen, "memoria eta bakea eraikitzeko garaiotan kontuan hartzeko lana" delakoan, "azpimarratzen baitu gertakari historikoen atzean pertsonak daudela beti". Argoitiak Barrengo kideak eta Berriakoak eskertu zituen.

Sari Nagusia: Berriak Olinpiar Jokoei egindako jarraipena

Allande Boutin epaimahai kideak azpimarratu zuen kirolaren ikuspegi oso eta zabala eman zuela Berriak, testuinguru soziala, herrialdeetako egoerak eta ezkutuko errealitateak agerraraziz, Hego eta Ipar Euskal Herriko jokalariak orekatuz eta emakumeen kirolari eta nagusi ez diren kirolei dagokien lekua emanaz. Lara Madinabeitiak, Arnaiz eta Imanol Magrok jaso zuten saria kirol sailaren izenean eta Magrok Berria eskertu zuen "krisi garaiotan handira jo zuelako hordago". Sari ekonomikoa Berria Lagunei emango dietela jakinarazi zuen.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Euskalerria Irratia kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude