Urruñan gazte bat Poliziak hil duela salatu du haren familiak

  • Joan den astean atxilotu zuen Frantziako Poliziak Bader Idrissi Urruñan, eta koman eraman zuten ospitalera. Hiru egunera zendu zen.

Taser pistola batekin geldiarazi ondoren atxilotu zuen Frantziako Poliziak Bader Idrissi joan den asteazken arratsaldean, Urruñako (Lapurdi) Pausu auzoan. Bihotzekoak eman zion, eta hiru egun geroago zendu zen Baionako ospitalean. Gizon gaztearen senideek polizien jokabideari leporatu diote Idrissiren heriotza, Euskal Irratietan egin dituzten adierazpenetan; Samuel Vuelta Simon Baionako prokuradoreak ikerketa hasi du, eta hilotzaren autopsiaren emaitzak eskuetan izan arte adierazpenik ez egitea erabaki du. Ostiralean martxa isila eginen dute gaztearen senideek heriotza salatzeko, 15:00etan, Pausu auzotik Hendaiako polizia etxera.

Joan den asteazkenean gertatuaz bertsio kontrajarriak agerrarazi dituzte batzuek eta besteek. Gaztearen gorpuaren autopsiak eta Baionako prokuradorearen ikerketak argitu beharko dute. Euskal Irratiek bildu dituzten lekukotasunen arabera, Urruñako Pausu auzoko ostatu, farmazia eta komertzioetan gaindi ibili zen Idrissi, «jarrera bitxiekin». Eldarniotan zegoela kontatu diote auzokoek irratiari, ez zutela «ongi» ikusi. Xaia ostatutik igaro zela aipatu du Beñat Elizondo nagusiak, eta ondotik etxe batera sartu zela. «Bere onetik aterata zen. Pertsegitzen zutela, jendeak bazituela ondotik; bereziki laguntza eske ari zen», kontatu duenez. Azaldu du auzoan bertsio ezberdinak entzun dituela.

Koman ospitalera

Auzoko bizitegi batera sartu ondotik agertu zen Polizia, eta atxilotzen saiatu zen, baina, Idrissiren aitaordeari adierazi diotenez, ezin izan zuten geldiarazi. Taser pistola elektrikoak baliatu zituzten, eta horren ondorioz eman zion bihotzekoak, aitaordearen hitzetan. Euskal Irratiei erran dienaren arabera, Donibane Lohizuneko polizia etxera joateko deia egin zioten, eta han azaldu zioten «ezinezkoa» izan zela hura geldiaraztea. «Erran zidaten alde guzietara korrika ari zela, eta, horregatik, barra elektrikoarekin bi kolpe eman zizkiotela». Hiru egunera zendu zen gaztea Baionako ospitalean.

Poliziaren eta sokorri zerbitzuen lana auzitan jarri du Idrissiren aitaordeak, uste baitu ez zirela behar bezain fite aritu, eta, ondorioz, koman eraman zutela ospitalera. «Niretzat, taser kolpeak eragin zion bihotzaren gelditzea, eta ezin izan zuten suspertu, hamabost minutu pasatu ondoren oxigenoa ez zelako gehiago burmuinera igotzen».

Baionako ospitaleko iturrien arabera, gazteak arazoak zituen drogarekin, eta «behin baino gehiagotan» artatu behar izan zuten lehenago ere.

Albiste hau Berriatik ekarri dugu ARGIAra CC-BY-SA lizentzia libreak baliatuta.


Kanal honetatik interesatuko zaizu: Frantziako polizia
Aske utzi dituzte Lapurdin atxilotutako sei gazteak

Frantziako Poliziak sei gazte atxilotu zituen asteazken goizean, Urruñan, Hendaian eta Baionan. Uztailaren 14an erretreten erreformaren aurkako istiluen parte hartu eta "istiluak" eragitea eragotzi diete.


ARRAZAKERIA FRANTZIAKO POLIZIAN
Michel Kokoreff: "Polizia-sindikatuekilako kogestio batean dabil botere politikoa"

Historia errepikatu zaigu 2023ko [Frantziako auzo popularretako] matxinadekin. 2005ean bezala, Poliziarekin izandako topaketa hilgarri bat izan dute txinparta. Bi haserre erakustaldi horien arteko antzekotasunak begi-bistakoak izan arren, osagai berriak ere agertu dira. COVID-19... [+]


ARRAZAKERIA FRANTZIAKO POLIZIAN
Izaera sistemikoa aitortu ezinean

Aurten berrogei urte Frantziako banlieue edo auzo popularretakoek “Berdintasunaren Aldeko eta Arrazakeriaren Aurkako Martxa” burutu zutela Marseillatik Parisera arte. Aldarrikapenen artean zuten polizien gehiegikerien bukaera. Orduz geroztik testigantzak, ikerketak,... [+]


16 urteko gazte bat hil da Paris inguruko Elancourt hirian, Poliziaren auto batek uzkailirik

Bertsio ofizialaren arabera, motocross batean zebilen eta Polizia ikustearekin "ihes egin" du gazteak, eta paretik zetorren beste polizia auto baten aurka hartu du kolpea. Bi inkesta abiatu ditu  Frantziako Poliziaren Ikuskaritza Nagusiak: bata, gazteari... [+]


Eguneraketa berriak daude