Kazkabar ekaitzak azken egunetan eragindako kalte materialak zenbatzen ari dira Hego Euskal Herriko hainbat herritan, baina aurreratu dutenez, kalte handiak utzi ditu: ibilgailuak kaltetuta, errepideak eta etxeak urak hartuta, uzta galduta, eraikinetako kristalak hautsita... Are, astelehen arratsaldean Igorren emakume bat artatu dute, txingorrak zaurituta, EITB-k jaso duenez.

A. Angos erabiltzailearen bideo honetan ikusten da Igorren botatako txingorraren tamaina:

Eta zerua hautsi zan. #Igorre pic.twitter.com/TobUcN8Pfo

— A. Angos / ERRONKARIERA (@AAngos1) September 11, 2023

Bizkaitik sartu da denboralea, eta kolpatuenen artean daude Igorre, Dima, Zornotza, Iurreta, Ondarroa eta beste. Gipuzkoan ere galera materialak eragin ditu, hala nola Eibarren, Mutrikun, Azkoitian eta Azpeitian. Nafarroa hegoaldean, ordea, igandean izan zuten egunik okerrena, eta Fitero, Cintruenigo eta Corella herriak hondamendi eremu izendatzeko eskatu du Nafarroako Gobernuak.

Herri horietara joan dira Jose Mari Aierdi Ingurumen eta Landa Garapeneko kontseilaria eta Oskar Txibite Lurralde Kohesioko kontseilaria, bertako alkate eta arduradunekin hitz egin eta kalteak baloratzeko. Eskerrak eman dizkiete kalteak lehengoratzen lanean diharduten herritarrei, eta gogorarazi dute gobernuari helarazi behar dizkiotela jasandako kalteak, webgunean ahalbidetu duten tokian, balizko laguntzak onartu ahal izateko.

Halaber, Nafarroako Gobernuak azpimarratu du 2023an 36 udalerrik ohartarazi dituztela euriteen ondoriozko kalteak, eta 2,7 milioi euroko gastuak izan dituztela, azken asteburukoa kontuan izan gabe. Uzta galeren aurrean laborantza-aseguruen sistema eraginkorrena dela nabarmendu dute, horregatik, 2024ko aurrekontuetan “gehikuntza esanguratsua” izango dutela iragarri dute, aurtengoa kontuan izanda.