Astean zehar zabaldu zen albistea konfirmatu dute ostiral honetan Sergio Sayas eta Carlos García Adanerok, eta sortu duten plataforma politikoa aurkeztu dute Iruñean.
Dagoeneko plataformak badu 631 herritarren sostengua, UPNko diputatu ohiek azaldu dutenez. Modu honetan argi ikusarazten da UPNren baitan sortu den zatiketa. Bi diputatuek esan dutenez, hala ere, plataformako jende gehiena ez da UPNko militantea eta, diotenez, haiek ez dakite zehazki honek zer kalte sortu duen UPNn. "Guk UPN-n jarraitu nahi genuen", baina ez digute horretarako aukerarik eman, azaldu du Adanerok, Sarasate pasealekuko Foruen Monumentuaren aurrean egin duten agerraldian.
Oraingoz haiei sostengua erakutsi eta UPNren zigorrarekin kontentu ez zegoen jendearen haserrea bideratu nahi izan dutela azpimarratu dute, eta gero ikusiko dela hortik zer emaitza ateratzen den. Galdetu zaie ea hauteskundeetara aurkeztuko diren, baina ez dute argi utzi, lehenik plataformak zer bide egiten duen ikusi behar baita, eta gogorik bada, gero topatuko dela modurik gobernu alternatiba bat osatzeko.
Adanerok esan du Nafarroak alternatiba indartsu eta sinesgarria behar duela, “egungo Foru Gobernuaren alternatiba izango dena, eta ez makulu izatera mugatuko dena”. Plataforma politiko berriak bi ardatz izango lituzke: batek nabarmen begiratzen dio UPNk saldu ohi duen mezuetako bati, “Nafarroa komunitate politiko desberdina da, beti ere Espainia barruan eta haren baitan izateaz harro”; eta besteak, Espainiako eskuinean azken hilabeteetan oinarri den mezua, “askatasuna da gure oinarrizko printzipioa”.
Bi diputatuek jakinarazi dutenez, ostiraletik aurrera Plataformanavarra.com webgunea sortuko da. Webgunean eragile politiko berriarekin bat egiteko idazkia besterik ez dago oraingoz. Izena ere aurrerago jarriko diotela zehaztu dute.
Zizur Zendeako Udala (Nafarroa) UPNren hautagaitza batek gobernatzen du. 1936an Iruñean fusilatutako trenbidegileak ordezkatzen dituen Konpartsa Txikiko erraldoi baten presentziari betoa jarri dio.
Cristina Ibarrolak iragarri du UPNko lehendakaritzarako hautagaitza aurkeztuko duela datorren apirilaren 28an alderdiak egingo duen kongresuan. Alderdiaren Erriberako lerroetan iragarpena ez bide da ongi hartu.
Eguesibarreko EH Bilduk kritika egin zion UPNko udal gobernuari, Gabonetako programazioan euskarazko ekitaldi gutxi zirelako, eta Xuriñe Peña alkateak erantzun zion euskarazko ekitaldiak baztertzaileak direla euskaraz ez dakitenentzat.
UPNk oso gogor erantzun dio PSNri Iruñeko Udaleko zentsura mozioa dela medio eta inoiz ez bezalako irainak zuzendu dizkie sozialistei. EH Bildu, aldiz, ostiral goizean hasi da biltzen oposizioko taldeekin, datorren udal taldea osatzeari begira.