Legea 2016an onartu zen Euskal Autonomia Erkidegoko Legebiltzarreran, baina ordutik auzitegietan geldi dago jaso dituen helegiteak direla eta. Orduan Alderdi Popularra zegoen agintean Espainiako Gobernuan, eta PPk zein Ciudadanosek helegitea jarri zioten legeari. PSE boterera iritsi zenean, negoziaketa batzuen ondoren eta artikulu batzuk aldatu ostean, legea adostu zuten Eusko Jaurlaritzak eta Espainiako Gobernuak. Ciudadanos eta PPk Auzitegi Konstituzionalean jarritako helegiteak gaindituko direla espero da, eta hala izatekotan, irailaren erdialdean onartuko da dekretua.

Nahiz eta 1978 eta 1999 urteen artean izan diren estatuaren biktimen zifra ofizialik ez izan, Eusko Jaurlaritzak 315 eta 447 biktima aitortuko direla aurreikusten du. Hala ere, Jonan Fernandezek, Bake eta Bizikidetzako idazkariak, kopuru hori tentuz hartu beharrekoa dela esan du: “Kalte-ordainak jasotzeko eskubidea izan dezaketenak dira horiek, baina legeak aitortzen die biktima estatusa lesiorik izan ez dutenei ere”.

Hiru kalte-ordain izatea espero da; kalte-ordain oparoena elbarritasun larria eragin dien biktimei emango zaie, 390.000 eurokoa; kide bat hil dieten familiei, berriz, 135.000 euroko kalte-ordaina emango diete; eta elbarritasun partziala eragin dietenei, berriz, 35.000 eurokoa.

Legez kontrako errepresio egoeran eskubideak urratu zaizkien biktimek administrazio ebazpena edo ebazpen judiziala aurkeztu beharko dute. Ondoren, Balorazio Batzordearen esku egongo da biktima izaera aitortzea, kalteen balorazioa egitea eta ondorengo ebazpenak egitea.