Petrolioaren, gasaren eta ikatzaren aldeko 636 lobby zenbatu dituzte COP27 gailurrean

  • Petrolioaren, gasaren eta ikatzaren aldekoak indartsu daude aurten ere: iaz Glasgowen bildutakoa baino %25 gehiago dira aurtengo COP27 biltzarrean. Klima larrialdiak gehien kaltetu hamar estatuek baino ordezkaritza zabalagoa dute lobby horiek. Guztira 33.000 ordezkari daude Egiptoko Xarm el-Xeikh hirian, izan estatuenak, elkarteenak, enpresa pribatuenak edota lobby taldeenak.


2022ko azaroaren 11n - 10:40

COP27 gailurreko parte-hartzaileen zerrendari hurbiletik begiratu die Corporate Accountability, Corporate Europe Observatory eta Global Witness Gobernuz Kanpoko Erakundeek eta horra datu kezkagarria: erregai fosilen sektorearen alde dabiltzan 636 lobbysta kontatu dituzte –iazko gailurrean 503 ziren–. Gainera, herrien ordezkaritzetan ere daude. Guztira 29 herrien taldeetan dira; Arabiar Emirerri Batuak ditu gehien, orotara 70 ordezkari eta ondotik dator Errusia, 33 lobbystekin.

TotalEnergies, Shell, ExxonMobil, Shell, Chevron edota BP gisako multinazionalak bertan daude. Baina horrez gain, helburu berarekin antolaturiko bestelako egiturak ere badaude gailurrean. Adibidez, 130 ordezkari bidali dituen IETA Isurketa Eskubideen Trukaketarako Nazioarteko Elkartea –aurretik zerrendaturiko multinazionalak ditu bere baitan egitura horrek ere–.

Presio taldeak hor izanen direino aterabide eraginkorrik ez dela lortuko deitoratu dute Corporate Accountability, Corporate Europe Observatory eta Global Witness erakundeek: “Paludismoa borrokatzeko ez dituzu eltxoak gomitatzen”. Lobby horien greenwashing logika eta “aterabideen atzeratzea” deitoratu dute, beste behin ere.

Paraleloki, ingurumenaren alde borrokan dabiltzan Hegoko elkarteetako ordezkariek bertaratzeko trabak kausitu dituzte: bisa ezin lortua, Egiptok bideratu neurri errepresiboak edota oztopo ekonomikoagatik.

Ondoko datuak ere kezka eragin die benetako aldaketa eta aterabideen alde dabiltzanei: klima larrialdiak gehien kaltetu hamar estatuek baino ordezkaritza zabalagoa dute petrolioaren, gasaren eta ikatzaren aldeko lobbyek. Porto Rico, Birmania, Haiti, Filipinak, Mozambike, Birmania, Bahamak, Bangladesh, Pakistan, Thailandia eta Nepal dira munduko herri gehien kaltetuak.

Erregaien sektoreko enpresak zergapetzeko deia

Uhartetar Estatu Ttipien Aliantzak “hitzetik ekintzetara” pasatzeko deia zabaldu zuen azaroaren 8an, COP27 gailurretik: petrolioaren, ikatzaren eta gasaren sektoreko enpresen zergapetzea ezinbestekotzat dauka. Gaur egun, 52 uhartetar estatu ttipiek isurketen %1 bakarrik eragiten badute ere, horiek dute klima larrialdia gehien pairatzen.

Karibe itsasoko Antigua eta Barbuda estatuko lehen ministro Gaston Brownek ondokoa adierazi zuen egun horretan: "70.000 milioi dolar inguru irabazita, garapen-bidean dauden herrialdeen klima-kalte nagusien kostuak estaltzeko dirutza baino gehiago irabazi dute erregai fosilen sektoreko sei enpresa nagusiek aurtengo lehen seihilekoan. Izugarrizko irabaziak lortzen dituzte giza zibilizazioaren kaltetan. Irabaziak egiten dituzten bitartean, planeta erre egiten da”.

Azaroaren 6an hasi eta 18an bukatuko da klimaren aldeko gailurra. Parisko 2015eko gailurrean ondoko helburua finkatu zuten: mendearen bukaeran munduko batez besteko tenperaturaren igoera 2ºCtik beherakoa izatea da, eta ahal bada, 1,5ºCtan geratzea, industriaurreko maila oinarri hartuta. Baina Egiptoko COP27aren bezperan GIEC Klima Larrialdiari Buruzko Gobernu Arteko Taldeak ohartarazi du helburu hori ez dela betegarria: "Egia erran behar zaie herritarrei".

Arrazoia izango dute aditu horiek, jakinik gainera, petrolio, gas eta ikatzaren industriaren alde dabiltzan 636 lobbyak buru belarri ariko direla lanean sistemak bere horretan mantentzearen alde.


Kanal honetatik interesatuko zaizu: Larrialdi klimatikoa
2024-03-31 | Ula Iruretagoiena
Lurraldea eta arkitektura
Bestaldera begira

Eta arkitektoen burbuilean, krisi klimatikoaren gaineko kezka igartzen al da? Galdetu dit agroekologoak.

Eraikuntzaren sektorea CO2 emisioen portzentaje altuaren eragilea izanik, galderak zentzua badu. Naomi Klein-ek Honek dena aldatzen du liburuan kontatzen du nola hegazkin... [+]


2024-03-24 | Nicolas Goñi
CO2a atmosferatik kentzeko ingeniaritza: lurra ustiatzen segitzeko aitzakia?

Klimaren arazoa ingeniaritza kontu bat soilik ote da? Atmosferaren berotegi efektua indartu du munduaren industrializazioak, karbono dioxido kopuru erraldoiak isuri baititugu airera, gure biziraupena kolokan ezarri arte. Zergatik ez, beraz, karbono dioxido hori berriz harrapatu,... [+]


Numeriko iraunkorraren eguna Baionako Estitxu Robles kolegioan

Martxoaren 6an numeriko edo digital iraunkorraren eguna ospatu dute Baionako Estitxu Robles kolegioan. Ordenagailu zaharrak berregokitzen ikasi dute eta Ilargikoop ikasle kooperatibaren berri jaso dute.


Asfaltozko patioa zuhaitz eta landarez betetako zelai bihurtu dute Lizarrako eskolan

Jolastoki eta ikastetxeko sarrera zen asfaltozko 350 metro koadroak berdegune bihurtu dituzte Haur eta Lehen Hezkuntzako Remontival eskola publikoan, Lizarran. Landaturiko zuhaitz, zuhaixka eta landareek helburu dute, besteak beste, beroa eta hotza hobeto kudeatzea,... [+]


Artea suntsitzeko arrazoiak

Londres, 1914ko martxoaren 10a. Mary Raleigh Rochardson (1889-1961) sufragista eta WSPUko kidea National Galleryra sartu zen, soinekoan laban bat gordeta zuela. Diego Velazquezen Ispiluko venus ezagunaren parera iritsi zenean, mihisea zazpi aldiz sastakatu zuen, guardiek... [+]


Eguneraketa berriak daude