ARGIA.eus

2020ko ekainaren 04a

Peronismo irabazleak Argentinako matxinada giroari egin beharko dio aurre

  • Alberto Fernándezek espero baino samurrago irabazi dio Argentinako lehendakaritza Mauricio Macriri. Hemeretzi alderdi eta peronismoaren sektoreak biltzea lortu duen Guztion Frontea indarrak botoen %48 lortu du eta Macri egungo lehendakari eskuindarraren Alda Dezagun koalizioak %40,55.

ARGIA @argia
2019ko urriaren 28a
Cristina Fernandez de Kichner eta Alberto Fernandez irabazleak garaipena ospatzen.

Herrialdea oso egoera estuan dagoela iritsiko da lehendakaritzara Fernández, abenduan, eta ikusi beharko da zein batasun mailarekin erantzuten dion fronte zabal honek lehendakari berriaren agintaldiari. Fernandezen alboan izango da Cristina Fernández de Kichner Macriren aurreko lehendakaria.

Macriren agintaldia neoliberalismoaren itzulera izan da eta orain Fernandezek hark birrindutako eskubide sozialen esparruari duintasuna eman beharko dio, baina krisi handi baten erdian. Argentinak 130.000 milioiko kanpo zorra du Rebelión guneko artikulu honetan azaltzen denez; adibidez, 2020an 20.000 euroko dirutza itzuli beharko du zor horren interesak eta amortizazioa dela eta.

Itzuli beharreko kopuru horien artean dira aurten Nazioarteko Diru Funtsak (FMI) utzitako 44.000 euroak. Agintari peronistek erabaki beharko dute behin-behinekoz uko egiten dioten zorraren ordainketari edo FMIk maileguen baldintza gisa jartzen dituen egiturazko doikuntza gogorrei ekiten dieten. Edozein kasutan, itxura guztien arabera, aberatsenen zergak bai igoko dituzte.

Askoren ustez, Fernándezek irabazi ezean, herritarren matxinada segurutzat jotzen zen, azken urteetan pobreziak oso egoera larrian utzi baititu herritarren esparru zabalak. Azken hilabeteetan asko ari dira gogoratzen 2001eko corralitoaren bueltan Argentinak bizi zuen egoera zaila.

Edozein kasutan, irabazle gisa egin duen lehen agerraldian Fernándezek argi utzi du ez dela AEBen eragin eremuan kokatuko, eta hauteskundeak irabazi berri dituen Evo Morales zoriondu du; Brasili, aldiz, eskatu dio bere urtemugan aska dezala Lula da Silva Brasilgo lehendakari ohia.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Argentina

Argentina kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude