Hilabete baino gutxiago falta da Donostiako Piraten Aste Nagusirako. Hori dela eta, gaur goizean agerraldia egin dute kaian, aurtengo egitarauaren eta bestelakoen berri emateko. Auzolanari tiraka! lelopean, abuztuaren 9tik 17ra elkartuko dira Flamenka gunean, eta hiriko beste hainbat txokotan. Zortzi eguneko egitaraua hemen ikus dezakezue.
Inge Ugartek eta Aitor Egañak eman dituzte xehetasun guztiak. “Abant goaz, haizeen kontra sigi-saga, dotore, urteetako bidaia luze honetan ezinbesteko bidelagun izan ditugun Ezkila Kapitaina eta Matti adiskideen laguntzarekin. Beti bezala, Mattik aldarri bat eramango du besapean, gure baloreekin bat datorren lana egiten duen mugimendu, elkarte edo talde batek ordezkatuta”, adierazi dute.
Hain zuzen ere, Donostiako Pentsiodunen Mugimendua izango da aurtengo Matti. Haiek omentzeko arrazoiak azaldu dituzte: “Pertsona guztiak zahartuko gara eta, inoiz baino gehiago, beharko dugu duintasunez eta zaintzaz lagunduta bizitzeko testuingurua. Horretarako, ezinbestekoa da sarea eraikitzea, soziala, noski, belaunaldi arteko elkartasunean oinarriturikoa, baina, baita ekonomikoa ere: publikoa eta kalitatezkoa. Eta horren aldeko borroka bizian ari dira haiek, pentsiodunak. 2018az geroztik daude antolatuta Hego Euskal Herrian, eta baita Donostia mailan ere”.
Horrekin batera, urtetan egindako lana aitortu nahi diete. “Urteetako ibilbidean zehar, askotariko aldarriak izan dituzte. Hala nola, pentsioen balioa Kontsumorako Prezioen Indizearen (KPI) arabera eguneratu zezatela, edo gutxieneko pentsioa igo dezatela. Gaur egun ere, gutxieneko pentsioa igotzeko borrokan dihardute mugimenduko kideek, baina aldatu egin dute aldarria: gutxieneko pentsioa gutxieneko soldatarekin pareka dezatela eskatzen dute”, gaineratu dute.
Beraz, Donostiako Pentsiodunen Mugimendua azken urteotan omendu dituzten eragileen zerrendara batuko da: Martuteneko Auzo Elkartea, Etxe Kaleratzeen Aurkako kolektiboa, Irutxuloko Hitza komunikabidea, Aborto Eskubidearen Aldeko Mugimendua, Altsasuko Gurasoak, NAIZEN elkartea, Euskal Herriko Bilgune Feminista edo Kaleko Afari Solidarioak.
Zortzi eguneko egitaraua
Aurten ere, zortzi eguneko egitaraua prestatu dute. Egunean zehar askotariko ekintzak izango dituzte Flamenkan zein Donostiako beste zenbait txokotan: bertso saioak, kalejirak, kuadrillen arteko jolasak, playback lehiaketa, azoka, herri bazkariak…
Noski, Abordatzea ere ez da faltako. “Hilaren 11n, baltsak uretara bota eta edozer dugula posible aldarrikatuko dugu”, adierazi dute. Era berean, abuztuaren 15ean, ostiralarekin, “egun osoko egitarau berezi eta bateratuarekin” ospatuko dute Piraten Eguna. Haurrentzako jokoak, hockey tailerra, abordatze txikia eta beste ere antolatu dituzte.
Musika eskaintza, bi gunetan
Flamenka eta Trinitate plaza izango dira piraten musika eskaintzaren bi guneak, beste behin ere. “Urtero egin ohi dugun bezala, tokiko musikariei lehentasuna emanaz, programazio anitza, euskalduna eta feminista osatu dugu”, nabarmendu dute. Flamenkako programazioa dagoeneko aurreratu zuten. Orekka erromeria, Izaki Gardenak, Olatz Salvador, La Txama, Goxua’n Salsa, Hofe, Labar, Eusko Princess, Bengo, Merina Gris, Añube, Sukena, Marte Lasarte, Indabe eta Lukiek talde eta bakarlariak ariko dira kaiko oholtzan.
Trinitate plazan, berriz, “proposamen txikiagoen zale diren piraton gozamenera bideraturiko” egitaraua prestatu dute: Revolutionary Brothers, Peppermint Sextet, Andoni Ollokiegi, Larre, Badmintones, ON, Ekiza & Xak, Pelax eta La Jodedera.
Autodefentsa eta transfeminismoa
Aurten ere Piraten Lantalde Feminista martxan dela jakinarazi dute, eta aurreko urtean hartutako lan ildoetan sakontzen jarraituko dute. “Bide horretan, kai gunean erasoak salatzeko puntu morea jarriko dugu eta, bertan salaketa egiteaz gain, behar lukeenari, Bulebarreko artatze gunera akonpainamendua egingo zaio. Izan ere, kontziente gara artatzeak pertsona profesionalek egin behar dituztela, eta, horretarako, udalak, Emagin elkarteak kudeatutako artatze gunea jarriko du Bulebarrean behar duenari lehen arreta emateko”, esan dute.
Hala ere, Donostiako Piraten lantalde feministatik garbi ikusten dute ez dela nahikoa hiri guztiko erasoak puntu bakar batean artatzearekin, eta hirian zehar puntu gehiago jartzeko eskatzen ari dira: “Piratok gure jai gunean gertatzen diren eraso anitzetan begirada fintzen jarraitzen dugu eta, norabide horretan gure protokoloetan sakontzen jarraitu dugu”.
Gainera, erasoen aurrean autodefentsa feministaz erantzungo dutela argi uzteko kaleak hartuko dituzte, abuztuaren 16an, 19:30ean. “Agerraldi honetan parte hartzera dei egiten dizuegu. Erasoek jarraitzen duten bitartean aurrean egongo garelako, eta hauei aurre egitea denon ardura delako”, adierazi dute.
Azkenik, Sardiñeren kofradiarekin elkarlanean, abuztuaren 12ko, astearteko, egitaraua “jantzi” dutela gogorarazi nahi izan dute: “Kalejira Transfeminista aldarrikatzailean parte-hartzeko gonbita luzatu, eta baita ondorengo Maruxaken show- era eta gaueko Lumatza festara! Errebeldia transfeministaz jantziko ditugu Donostiako kaleak, eta bertan behar zaituztegu denak!”.
