Ortzirale beltzak
Urriak 1: Kataluniako erreferendumaren urteurrenean, Espainiako telebistak zehaztu digu zenbat enpresak egin duten alde prozesua martxan jarri zenetik (ez digu erran, ordea, denboraldi berean baten bat finkatu ote den). Kontuak, bistan da, gutienez bi irakurketa ditu: zeinen kaltegarria izan den eta den independentismoa ekonomiarako, edo zeinen lotsagabe saiatu den botere ekonomikoa jendearen erabaki politikoak baldintzatzen.
Albiste berean, erreferenduma bakarrik senti ez zedin, ilegal izenondoa paratu diote ondoan solasa ahoskatu duten aldioro. Adjektiboak balio dezake independentismoa zeinen arduragabe jokatu duen erakusteko, edo Espainiako Gobernuak erreferenduma legez kanpo uzteko egin dituen eginahal guziak salatzeko. Enpresekin bezala, puntu honetan ere lehen interpretazio aldera lerratzen zen albistea, bigarrena pentsaezin bihurtzeraino.
Haserre nago –tira, mintzatzeko manera bat da– albistean manipulazioa ikusten dudalako, edo nirea ez den ikuspuntu –zilegi– bat eman dutelako? Hobe langileei berei galdegitea: zenbait hilabetez, Espainiako telebistako langileak beltzez jantzita agertzen ziren ortziralero, hedabide publikoak sufritzen zuen manipulazioa salatzeko. Protesta hori akitu zen; alta bada, nire begi trebatu gabeetan ez da diferentzia handirik PPren tirania jasanezinaren hankapean ematen zen informazioaren eta oraingo askatasunari esker ematen denaren artean. Ez bederen Katalunian.
Noraino dira manipulatzen duen hedabide bateko langileak manipulazio horren erantzule? Noraino adierazi behar diegu elkartasuna, protesta egiten dutelarik? Ez dakit. Baina zalantzak argitu bitartean, barka biezadate Espainiako telebistako kazetariek ortziraleroko duintasun profesional minduaren erakustaldi hartan itxurakeria pittin bat ikusten badut.
Bidali zure iritzi artikuluak iritzia@argia.eus helbide elektronikora
ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.
Balirudike dena kontrolpean dagoela, badakitela guri nola sinetsarazi edozer, ez dugula inoiz, berez, guk nahi duguna egiten. Iragarki konstante batean bizi bagina bezala, esaten dugu “aukera berdintasuna”, eta pentsatzen dugu esaten ari garela “aukera... [+]
Baltimore ibai gaineko zubiaren erorketa urte bukaerako oroimeneko irudien artean jasoko da, zubi baten erorketa ikuskizun zirraragarri eta salbuespenekoa baita. Zeren eta zubiak eta eraikinak ez dira berez erortzen, lehergailu edo artefaktu baten eztandak bat-batekotasunaren... [+]
Eremu digitalak, gizakion dinamiketatik edaten duen heinean, gizarte eredu ezberdinetan aurkitu ditzakegun antzeko arazoak ditu. Pertsonen arteko arazo asko botere kontua izan ohi da; botere arazoek indarkeria dakarte zenbaitetan. Esate baterako, indarkeria matxista.
Eremu... [+]
Etxebizitza duina izatea gero eta zailagoa da. Berdin du esaldi hori noiz irakurtzen duzun, urteak pasa eta arazoa gero eta larriagoa da.
Nola izan daiteke bizitzeko oinarrizkoa den eskubidea, teorian hainbat legek babestutakoa, EAEn eskubide subjektibo moduan onartu berri... [+]