Oilagorrek bizirik irauteko aukera gutxiago dituzte Gipuzkoan Araban baino, ehiztarien presioagatik
Negua pasatzen Araban geratzen diren oilagorrek bizirik irauteko aukera handiagoak dauzkate Gipuzkoan egokitzen direnek baino, berrikitan bertako zientzialari batzuek demostratu dutenez. Hori hala da Gipuzkoan ehiztarien presio handiagoa jasaten dutelako, Foru Aldundiak gipuzkoarrei astearen zazpi egunetan baimentzen dielako oilagorrei tiro egitea.
aurre egingo dieten hedabide independenteak
Nerea Prieto, Giacomo Tavecchia, Ibon Telletxea, Ruben Ibañez, Fermin Ansorregi, Aitor Galdos, Aitor Urruzola, Ixtoan Iriarte eta Juan Arizagak sinatu dute Journal of Ornithology zientzi aldizkariak publikatu duen ikerlana: "Survival probabilities of wintering Eurasian Woodcocks Scolopax rusticola in northern Spain reveal a direct link with hunting regimes" eta Naturkon elkarteari esker jakin da hemen albistea. Ikerlariok egin dute Araban eta Gipuzkoan negua pasatzera heldutako oilagorren jarraipena eta beren lanarekin ohartu dira Araban udaberrira bizirik iristen direla %56; aldiz, Gipuzkoan %37 baino ez.
Batean eta bestean hegaztiok bizi dituzten baldintzetan arakatuz, ehizaren presio ezberdina da diferentzia nabarmenena. Araban oilagorretan aritzea astean hiru egunez daukate baimenduta ehiztariek, baina Gipuzkoako agintariek bertakoei astearen egun guztietan tiro egitea lagatzen die. Ondorioa: oilagorrek Gipuzkoan geratuta hiltzeko doble arrisku dauzkatela Araban geratuta baino.
