Miren Jone Azurza hil da, 'Zeruko Argia'-ko zuzendaria izana

  • Miren Jone Azurza Aristigieta hil da maiatzaren 16an 92 urterekin, Berriak informatu duenez. 1929an Donostian jaioa, euskal kazetaritza modernoaren aitzindarietako bat izan zen, baita euskal hedabide bat zuzentzen zuen lehen emakumea ere. Zeruko ARGIAko zuzendaria izan zen frankismoaren azken txanpan, 1969-1975 artean. Gerora ere kazetaritzan jarraitu zuen beste hamarkada batez, Deian.


2022ko maiatzaren 16an - 10:23
Miren Jone Azurza, Argiaren proiektuko lehen zuzendari emakumea. (Dani Blanco)

Donostiako Antigua auzoan jaioa, Gasteizko Misiolari Sekularren egoitzan sartu zen 1950eko apirilean. Bi urteko prestakuntzaren ostean, irakasle hasi zen Avilako Residencia Ciudad Ducal ikastetxean, eta zuzendaria ere izan zen, Wikipediako biografian irakurri daitekeenez. 1950eko hamarkadaren amaieran, Vida Nueva aldizkari katolikoan idazteko proposamena egin zioten. Urte pare bat kazetari jardun ondoren, titulua ateratzea erabaki zuen. Praktikak Bilboko La Gaceta del Norte egunkarian egin zituen.

Kazetaritza ikastera Madrilera joan zen 60ko hamarkadaren hasieran: “Hiru urte egin nituen, ez nuen ezer ikasi baina titulua lortu bai. Hala ere, hango giroa arrotza zen. Ni beti izan naiz euskalduna eta abertzalea, han ez nenbilen oso gustura eta Donostiara itzuli nintzen lanari ekitekotan”. Etxean Zeruko Argia erosten zuten eta aldizkariko fraideei ere berehala utzi zien bere txartela; hauek handik bi urtera deitu zuten. Andoni Iturria zen orduan zuzendari eta Azurza erredaktorea, baina hark utzi zuen eta 1969an kaputxinoek azken honi eskaini zioten zuzendaritza. Aldizkariaren 400. zenbakia egin zuten 1970eko azaroaren 1ean eta zenbaki berezia eginez ospatu zuten.

“60ko garai hartan ere Zeruko Argia zen, baina Zeruko hizki txikiz eta ARGIA handiz agertzen ziren. Eliza eta erlijio kontuak biziak ziren garai hartan eta, beraz, bazen albisterik haien inguruan, baina beste gaien parean landu nahi ziren”, adierazi zien Xabier Letona eta Estitxu Eizagirreri.

Zeruko Argian hasi eta urtebetera zuzendari izendatu zuten. Garai hartan, Zeruko Argia iritzi-artikuluen bilduma zen batez ere. Miren Jonek argi ikusi zuen astekaria profesionalizatzeko eta modernizatzeko premia, kazetaritzaren genero guztiak lantzeko (elkarrizketak, erreportajeak...). Aldizkari zabala egin nahi izan zuen, euskaldun guztiek irakurtzeko modukoa; Mikel Atxaga lankide hurbila izan zuen ahalegin horretan. Erredakzio talde bat osatu zuten hainbat gaitan aditu zirenekin, eta laguntzaileak bilatu herrietan, tokian tokiko kronikak idazteko.

Ordurako, argitalpenak baserri girotik hirirako jauzia egina zuen jada. Mari Karmen Garmendia, Begoña Arregi, Carlos Santamaria, Rikardo Arregi, Nemesio Etxaniz, Txillardegi (Larresoro) eta beste asko ari ziren bertan idazten.

Aldizkariaren norabidea zela-eta izan zituen desadostasunak tarteko, Zeruko Argia utzi zuen eta Historia ikasketak egin Deustuko Unibertsitatean. Deia egunkarian ere aritu zen lanean, kulturaz eta Donostiako gaiez idatziz. Juan Olalde ezizenez iritzi zutabe bat ere bazuen.

Gerora, beste zenbait hedabidetan ere kolaboratu zuen: Garaia eta Muga-rako. 1990etik 1996ra, Jose Maria Setien gotzainaren prentsa bulegoan jardun zuen boluntario.

Ibilbide profesional horretan egindako lan guztiagatik, hainbat sari eta aitortza jaso ditu Miren Jone Azurza kazetariak. 2011. urtean, adibidez, Ohorezko Rikardo Arregi Saria jaso zuen, Inazio Agirrerekin batera. 2018. urtean, Euskaltzaindiak ohorezko euskaltzain izendatu zuen.

Historia ikasi zuen Deustuko Unibertsitatean. 1970eko hamarkada amaieran Deian hasi zen, eta 1990etik 1996ra Jose Maria Setien gotzainaren prentsa bulegoan lan egin zuen boluntario moduan.


Kanal honetatik interesatuko zaizu: Kazetaritza
2024-03-21 | Euskal Irratiak
Urtzi Urkizu
"Susmoa dut gizartearen parte handi batean badagoela kezka ETB-rekin"

Berrian lan egiten duen kazetariak, Euskal Telebistaz liburua idatzi berri du Txoria hodei artean, ETB lehen eta gero. Galdera batekin abiatzen du liburua kazetariak: 40 urte bete dituen Euskal Telebistak behar den gisan arrapostu ematen al dio euskal jendartearen egungo... [+]


Pablo Gonzalez "berehala" askatzea exijitu dute Gernikan eta nazioartean

Bi urte Polonian preso daraman kazetaria "berehala" askatzeko exijitu dute ehunka lagunek Gernikan. Madrilen, Espainiako Kongresuaren aurrean elkarretaratu dira alderdi ugaritako diputatuak; Espainiako Atzerri ministro Jose Manuel Albaresen esanetan, kazetariaren... [+]


2024-02-28 | ARGIA
Hedabideetako langileek elkarretaratzeak egin dituzte, Gonzalezen askatasuna eskatzeko

Euskal Herriko komunikabide eta kazetari ugarik, tartean ARGIAk, Pablo Gonzalezen egoera salatu eta haren askatasuna eskatu dute.


Pablo Gonzalez
Inongo frogarik erakutsi barik, bi urte espetxean Polonian

Otsailaren 28an bi urte bete dira Pablo Gonzalez kazetaria Polonian atxilotu zutela. Errusiako espioia izatea leporatu zioten hango zerbitzu sekretuek, baina oraindik ez dute horren froga edo zantzu ñimiñoena erakutsi.


Eguneraketa berriak daude