Bihotz Bakartien Klubak sortu zuen Literatura Eskola, 2003an,  Frantziako eta Espainiako Estatuek inposatutako curriculum “arrotzari” erantzuteko tresna gisa.

Gotzon Barandiaren idazlearen hitzetan: “Frantziak eta Espainiak inposatutako curriculumetako literatura arrotza zen guretzat, ez gintuen betetzen. Merkatuak, berriz, irakurtzeko modu bat inposatzen zigun, literatura jakin bat, salmentekin eta izen handiekin lotua, guri edukiz nahiko hutsala iruditzen zitzaiguna”.

Inguruarekin konforme ez eta Literatura Eskola antolatu zuten: “Erabaki genuen, inoren zain egon gabe, gu geure burua elikatzen hastea”.

Geroztik 10 urte pasa dira. Ospatzeko zortzi hitzaldi emango dituzte; hilean behin, bakoitza Euskal Herriko txoko batean.

Lehenengo hitzaldian, Ander Lipusen antzekigintza aztertuko du Jaime Valverdek. Hurrengo saioan, azaroaren 16an, Txinako literatura garaikidearen inguruan arituko da Maialen Marin.

Beste hainbat gai ere jorratuko dituzte: besteak beste, Sarrionandia, Saizarbitoria eta abangoardia euskal litaraturan.

Egitarau osoa hemen ikusgai.

Eskolaren oinarriak

“Euskal Herritik eta euskaratik” lan egin nahi dute, eta jakinminari erantzun asmoz. “Nahi genuen jakin zergatik idazle batek idazten zuen lan bat, zertarako, noiz, zein testuinguru historikotan… Eta nahi genuen, inork zer irakurri behar genuen esan gabe, zer irakurri geuk erabaki” adierazi du Barandiaranek.

Sortu zenetik 10 urte pasa dira, eta Eskolak literatura zabaldu nahi duten taldeen arteko “sinergia” lortu dutela diote bertako kideek.

Zortzi elkartek osatzen dute: Euskal Idazleen Elkarteak, Euskal Itzultzaile, Zuzentzaile eta Interpreteen Elkarteak, Euskal Herriko Antzerkizale Elkarteak, 111 Akademiak, UEUko Literatura sailak, Sareinak-ek eta Elearazik.

Eguneroko jarduna: literaturaren inguruko formazio saioak

Hamar urte hauetan litaraturari buruzko formazio klaseak eman diztuzte Euskal Herriko hainbat herritan. “Elitismorik gabeko gunea da”, diotenez, parte hartzean oinarritutakoa.