Lekukoa hartzeko prest

  • 2014ko finalean buruz-burukora heldu ziren bi bertsolariek, Fredi Paiak eta Arkaitz Estiballesek, ez dute izena eman 2016ko Bizkaiko Bertsolari Txapelketan. Beraz, zentzuzkoa da bertsozaleak bere buruari egiten dion galdera: Eutsiko ote dio aurtengo txapelketak aurreko urteetako mailari? Hiru finalaurrekoetan izan gara eta ondorio hau atera dugu: Beteranoak sasoiko daude oraindik eta gazteak indartsu datoz. Alegia, Igor Elortza, Estiballes, Paia eta konpainiari lekukoa hartzeko hautagaiak nahi beste daude. Faborito garbirik gabe, gainera, abenduaren 17ko finala inoiz baino irekiagoa eta zirraragarriagoa izango da.

Dabi Piedra
2016ko abenduaren 12a
Onintza Enbeita Basauriko finalaurreko saioan.

Markina-Xemeingo Uni frontoian jokatu zen aurreneko finalaurrekoa, giro hotz samarrean. Hoztasun horretan nabarmendu zen Jone Uria, saioko irabazlea. Bertsoak eta ideiak seriotasunez josten ditu Uriak, akatsik gabe, sendo beti. Hamarreko handian eta bakarkakoan aritu zen ondoen eta aise irabazi zuen finalerako txartela.

Haren atzetik, bigarren izan zen Nerea Ibarzabal markinarra. Herrikideen aurrean onena eman zuen, barru-barrutik kantatuaz, eta lehenengoz izango da finalean. Hamarreko handian, adibidez, Oihana Bartraren ondoan, gertutik ezagutzen duen errealitate bat aipatu zuen, emakume zesta-puntalariena.

Bigarren finalaurrekoan, Basaurin, saioa irabazteko lehia estua izan zuten Beñat Ugartetxeak, Onintza Enbeitak eta Xabat Galletebeitiak. Mallabiarrak lortu zuen puntu gehien, baina muxikarra eta lekeitiarra ere Miribillako finalean izango dira. Urduri samar hasi zela onartu zuen Ugartetxeak, baina, pixkanaka, bere lekua aurkitu zuen oholtzan eta ale ederrak bota zituen. Bakarkakoa, Iban Mayo txirrindulari ohiaren azaletik eta dopin kontuen testuinguruan, biribila izan zen. Aurretik ere, Aitor Bizkarra gaztearen ondoan, zortziko txikian dotore aritu zen Ugartetxea.

Lehenengo finalaurrekoan Nerea Ibarzabalek herrikideen aurrean onena eman zuela aipatu badugu, zer esan hirugarren finalaurrekoaz. Larrabetzun, bere herrian, saio ederra ondu zuen Etxahun Lekuek, hasieratik amaierara. Ideia sendoak erraztasunez adierazi zituen, hizkera aberatsez, eta merezimenduz irabazi zuen. Ibon Ajuriagojeaskoa bigarrenaren eta Miren Amuriza hirugarrenaren lana ere txalotzekoak izan ziren. Hain zuzen ere, bien arteko zortziko txikian entzun ziren saioko, eta finalaurreko saio guztietako, kolperik zorrotzenak. Publikoak gozatu egin zuen Ajuriagojeaskoaren vieirarekin eta Amurizaren txirlarekin.

 

Zortzi finalistetatik batek ere ez du inoiz Bizkaiko txapela jantzi. Esperientzia, ordea, kiloka daukate, Nerea Ibarzabal baita finalista berri bakarra. Aurreko finalean huts egin eta gero, bueltan dira beterano bi, Ugartetxea eta Ajuriagojeaskoa eta, azken aukeraren aurrean egon daitezkeela badakitenez, finalaurrekoetan erakutsi dute Bilbora ez direla egun pasa joango. Enbeitak ere heldutasuna izan zuen lagun Basaurin eta dohain horri ohi duen sentikortasuna gehitzen badio, kontuan hartzeko hautagaia izango da. Etxahun Lekue txapela janztear izan da maiz, eta arantza hori ateratzeko gaitasuna baduela garbi dago.

 

Gazteagoei dagokienez, Jone Uriaren izena kiniela gehienetan agertzen hasia da dagoeneko. Finaletan badu nahikoa eskarmentu, dohainak ere sobera, azken urratsa baino ez du falta. Arriskatzera ausartzen bada, finalista oso on bat izatetik txapeldun bikaina izatera pasa liteke. Xabat Galletebeitiak, aldiz, gai guztietako ertzak bilatzen segitzen du eta jada ez da ezustekoa bera finalean ikustea. Miren Amurizak ere badaki zer den gaiei bere galbahea pasatzea eta ukitu berezi horrek puntu asko ekar diezazkioke, entzuleen txaloez gain. Nerea Ibarzabal, gazteena izanagatik, bertsolari zailduagoen parera heldu dela ukaezina da, Markinako saioa aintzat hartuta.

 

Beraz, esku asko daude prest Fredi Paiak utzitako lekukoa hartzeko. Bertsozaleak daudela lasai, final bikaina ez ezik, emozio handikoa izango baita larunbatekoa.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Bizkaiko Bertsolari Txapelketa  |  Bilbo

Bizkaiko Bertsolari Txapelketa kanaletik interesatuko zaizu...
2016-12-19 | Miren Ibarluzea
Finalaren kronika: Reta, pankartak, galderak, gazi-gozoak...

Bazoaz finalera? Ordenagailurik gabe, lasai, entzun finala, gozatu, idatzi bihotzetik. Andereñoa zara? Koadernoa eta bolaluma saioko oharrak hartzeko gura dudala ez dut zertan esan estankoan, ezta?


Bizkaiko Bertsolari Txapelketako Udazkeneko Fasea abian da

Urriaren 15ean emango zaio hasiera txapelketako azken faseari Mungian. Abenduaren 17an amaituko da Bilboko Miribillan jokatuko den finalarekin.


2014-12-22 | Malen Aldalur
Umorea eta Paia nagusi Bizkaiko Bertsolari Txapelketan

Josi eta josi, josi eta josi. Horrela aritu da zortzikotea larunbatean Miribillako oholtza gainean. 4.350 pertsonaren begiak bertsoan iltzatuta; asmatu dute orratza trebe erabiltzen. 17.30etan puntuan hasi dute saioa, belarriak adi eta mingainak ahalik eta geldien zituzten entzuleen aurrean. Ia bost orduz bertsoa josten ibili dira Bibao Arenan.


2014-12-09 | Nerea Ibarzabal
Bizkaiko Bertsolari Txapelketako finala, erabakita

Igandean zehaztu da #Josi Bizkaiko Bertsolari Txapelketako finala jokatuko duen zortzikotea, Zornotzako azken finalaurrekoaren ostean. Arkaitz Estiballes, Iratxe Ibarra, Etxahun Lekue, Onintza Enbeita, Jone Uria, Oihana Bartra, Fredi Paia eta Xabat Galletebeitia dira aurtengo finalistak.


2014-10-13 | Nerea Ibarzabal
Be˝at Ugartetxeak irabazi du Bizkaiko Bertsolari Txapelketako lehenengo kanporaketa

Galdakaoko Torrezabal aretoan egin da Txapelketako lehen saioa, igande honetan. Ugartetxea mallabiarrak zuzenean lortu du finalaurrekoetarako txartela.


Azkenak
EGILEA
Eguneraketa berriak daude