Atxiloketetako bi Hazparnen egin dituzte. Itsasun egin dute beste bat, eta laugarrena Bordelen. Euskal Irratiak Jerome Bourrier Baionako prokuradorearekin harremanetan jarri da, eta hedabideari baieztatu dio atxiloketak egon direla. Berria-k ere hitz egin du Bourrierekin eta adierazi dio "pintaketa eta andeatze nazionalistak" leporatzen dizkietela gazteei, eta ikerketa Paueko Poliziaren esku dagoela.

Xuti Gazte! ekimenak atxiloketak salatu ditu sare sozialen bidez: “Euskal Herrian lan eta bizi nahi duen militante gazteen kontra jotzen du Frantziako Estatuak. Gazteriaren arazoei ezin zaie errepresioarekin erantzun”. " Errepresioaren aitzinean, elkartasuna eta borroka", adierazi du Ipar Euskal Herriko Konsteilu Sozialistak. EH Baik “gazteriaren kriminalizazioa” salatu du ohar batean, “sustengu osoa” adierazi die atxilotuei eta beren askatasuna exijitu du. “Frantziako Estatuak, iraganeko errezetekin segitzen du. Gehiengoaren aldarrikapenak ukatzen ditu eta errepresioa eta gazteriaren kriminalizazioaren parioa egiten du”.

Iluntzean utzi dituzte aske lau gazteak, kargurik gabe.

Mobilizazioak

Asteazken eguerdian atxiloketak salatzeko elkarretaratzea egin dute Bernat Etxepare lizeoan. Horrez gain, mobilizazioak egin dituzte arratsaldean. Herriko etxe parean elkartu dira Itsasun, eta manifestazio jendetsua egin dute. Hazparnen Elizako plazan elkartu dira.