Zaldibarko zabortegia amildu zenetik ia urtebete igaro den honetan, elkartasun ekitaldia antolatu dute ondoko helburuekin: gertatu zena oroitzea, erantzukizunak eskatzea eta epaiketan herri akusazioa martxan jartzea. Ekitaldia urtarrilaren 23an egingo da Eibarko Armeria Eskolan.
Otsailaren 6an beteko da urtebete Zaldibarko zabortegia amildu zenetik, bi langile lur azpian hartuz. Gertatutakoa argitzeko eskatuz dihardute herritarrek ordutik, eta bide horretan "Argitzen Lagundu" ekitaldia antolatu dute Zaldibar Argitu plataformak eta Euskal Herriko Eskubide Sozialen Kartak. Ekitaldia istripuaren urteurrena baino egun batzuk lehenago egingo da, urtarrilaren 23an, 12:30etatik aurrera Eibarko Armeria Eskolan.
Gertatu zena oroitzea, erantzukizunak eskatzea eta epaiketan herri akusazioa martxan jartzea dira ekitaldiaren xedeak, antolatzaileek jakinarazi dutenez. Bildutako dirua erabiliko da herri akusazioaren epaiketa kostuei aurre egiteko.
Hainbat artistak hartuko dute parte ekitaldian, izan dantzari, musikari zein bertsolari. Bertaratzen denak oholtza gainean ikusi ahalko ditu Petti, Liher, Olatz Salvador, Miren Amuriza, Udane Eskudero, Aritz Salamanca, Antton Fernández, Aiora Etxebeste, Mattin Etxebeste, Sastraka, Miren Narbaiza, Zaloa Urain, Maite Mursego, Nerea Ibarzabal, Eneko Sagardoy eta dantzariak, Nerea Ariznabarretak aurkeztuta.
Sarrerak 10 eurotan erosi ahalko dira Eibarren (Guridi), Zaldibarren (Imendia), Elgetan (Haizea) eta Ermuan (London). Online eskuratzeko aukera ere egondo da, entradium webgunean.
Zaldibar Argitu plataformak ekitaldia egin du igandean. Ez dago berririk “euskal oasian”, adierazi dute, “Eusko Jaurlaritzak dena ondo egin zuela errepikatu zuen”.
Baionako Auzitegiak ezarri duenez, Basusarrin dagoen Etcheverry-Mindurri enpresak 150.000 euroko isuna ordaindu beharko du, eta Donibane Lohizuneko CBA Artolak 100.000 eurokoa.
Enpresari eskatu dio lan horiek egiteko Arantxa Tapiaren sailak, baina Verter-ek ez du erantzun. Lanek “bospasei” urterako ziurtatuko dute zabortegiaren egonkortasuna, 750.000 euroko aurrekontuarekin.