Asteartean lau urte beteko dira Eitzagako zabortegia amildu zenetik, eta Zaldibar Argitu plataformak ekitaldia antolatu du hondamendia oroitzeko. Alberto Sololuze eta Joaquín Beltrán hil ziren zabor luizian, eta azken horren gorpuzkiak hondakin artean lurperatuta jarraitzen dute. Salatu dute eragindako kalteak ez direla oraindik osotasunean ezagutzen. Irekita dagoen auziak, ingurumenaren kontrako delituak aztertzen dituenak, lau urte beteko ditu instrukzio fasean. “Horrekin ia dena dago esanda”, aipatu dute. Azaroan deklaratu zuen lehenengoz Eusko Jaurlaritzako teknikari batek. Epailearen ondorioen zain daude oraindik.

Txalapartarekin hasi zuten ekitaldia, dantzariek hondamendia gogoratzeko eskulturaren aurrean egin zuten dantza, jarraian lore eskaintza egin zuten, eta Zaldibar Argituko ordezkari batek plataformaren oharra irakurri zuen. Auzoko bizilagun batek ere hitz batzuk bota zituen eitzagarren izenean. Ekitaldia biribiltzeko, kopla batzuk abestu zituzten.