ARGIA.eus

2021eko maiatzaren 06a

Kosovoko berri txarrak gauez banatzen zizkigun e-postaria

2002ko azaroaren 17a
Pello Zubiria pzubiria@argia.eus Sevdije Ahmeti du izena, 57 urte ditu eta Europan oihartzuna izan duen liburua plazaratu du: "Journal d'une femme du Kosovo (février 1998-mars 1999) (Kosovoko emakume baten egunkaria). Carlotte Valadek eman du liburuaren eta egilearen historia hunkigarriaren berri "Transfert" aldizkarian. Ahmetik, izan ere, serbiarrek Kosovoko albaniarren kontrako garbiketa etnikoa hedatzen zuten egunetan, erresistentziako ekintza eraginkorra burutu zuen: egunean zehar lortzen zituen informazioak posta elektronikoz buletin batean bildu eta munduan zehar ezagutuak zituen pertsonei (1.300 helbidetara) banatzen zizkien gauero. Buletin horiek osatzen dute NATOk serbiarrei erasotzeko erabakia hartu zuten eguna arteko gertakizun beldurgarrien kronika garratza. Kontakizun horiek aipatu titulua daraman liburuan argitaratu ditu berrikitan Parisen Gosearen kontrako eta Garapenaren aldeko Batzorde Katolikoak (CCFD). Lehen mezua 1998ko martxoaren 6an bidali zien bere 1.300 hartzaileei. "Gerra dago Kosovon. Baina dena 1989an hasi zen. Sinestezina da denbora guzti honetan guk inolako laguntzarik lortu ez izana (...) Ipuinean bezala `otsoa dator' esaka ari ginela uste zuten. Pazientzia galdu dugu eta konfidantza ere bai. Milesker anitz gerra ekiditeko ezer egin ez edo gerra lehertu dadin ahalegin guztia egin dutenei". Azken mezua 1999ko martxoaren 25ean bidali zuen Ahmetik, OTANek Pristina hiriburua bonbakatu zuen biharamonean. Azken kronika igorri eta biharamonean telefono haria moztu zioten emakumeari, eta martxoaren 28ko gauean gizon ezezagunak azaldu ziren ate joka, jo eta bertan hilko zutela oihuka. Ihes egin behar izan zuen. Ahizpa baten etxean ezkutaturik zegoela, maiatzaren 4an azaldu zitzaizkion lau gizon mozorrotu. Etxean ziren guztiak (ahizpa, senarra eta koinatua) bi orduz jipoitu eta torturatu ondoan, bederatziak arteko epea eman zieten alde egiteko. Eta garrantzizkoagoa zena: bere ordenagailua eraman zuten. "Ongi zekiten -dio Ahmetik- zeren bila zebiltzan. Biktimak arriskuan ez jartzeko ordura arte plazaratu gabe nituen agiriak, argazkirik onenak". Horietako asko betikoz galdurik dira. Kronikak bidaltzen hastearekin, Europako Segurtasun eta Elkarlan Erakundeak (OSCE) bi ordenadore eta argazki kamera digitala utzi zizkion. Eta tresna horiek lagun, Nazio Batuen Erakundeak eta batik bat Errefuxiatuen aldeko Komisarioak Kosovotik egiten zituzten bidaietan laguntzaile gisa joaten zen. Mugarik gabeko Medikuek eta Save the Children GKEek antolatzen zituzten konboiekin ere joaten ziren, Ahmeti eta bere laguna Vjosa medikua. Eta hala kurritu zuen Kosovo osoa, serbiarren desmasien lekukotasunak, elkarrizketak eta argazkiak bilduz. Internet, "miraria". 1995an izan zuen tresna honen lehen albistea, nazioarteko bilkura batean aurkeztu ziotenean NBEen babesean sortu berria zen Women Watch web gunea. Garai hartan Kosovo guztian ez zegoen webean nabigatzeko operatzaile komertzialik, soilik sare militante bat, Zana.pr, eskualdeko hogei ordenadore lotzen zituena. 1992an Association for Progressive Communicationerakundeak Jugoslaviarako antolatutako Zamir sarearen partaide zen: erakunde horrek kazetari independienteei eta bakearen aldeko erakundeei sare paraleloak antolatzen zizkien. Hori zen egoera 1995an. Baina 1998an gerra lehertu zenean, iadanik hemen ere Internet gorputz hartua zen, eta hari eskerrak hedatu zituen bere egunkariak Ahmetik. Gerra bukatuta, 2000ko udan, Milosevic epaitu behar zuen nazioarteko epaitegiko jueza Sevdije Ahmetiren bila joan zen Pristinara: ordenagailuko informazio baliotsu asko ohostua izan arren, Internet bidez zabaldutako lekukotasunak baliagarri izan zitzaizkion bere lanerako Epaitegiari. Baina bera ez da Hagan azaldu, epaiketan. "Orain biktimek behar dute mintzatu. Nik nire lana egin nuen". * Erreportajea oso-osorik irakurri nahi izanez gero egin klik hemen. Beste zenbait lotura: - Colby Magazinek Ahmetiri egindako erreportaia. - Koha Ditore egunkari kosovarra. - Network of East-West Women. - Kosovo.com, serbiarren ikuspegitik egina. - Nazio Batuen Kosovorako Misioa. - Italiako Amnesty Internationalek 1998an Kosovoko egoeraz egin dossierra.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Kosovo

Kosovo kanaletik interesatuko zaizu...

Azkenak
Argia buletina
Egunaren laburpena
zure e-postan
Eguneraketa berriak daude