Lakuako Segurtasun Sailaren 2018ko datuei erreparatuz gero, 101 izan ziren kirolarekin lotuta bideratutako zigor espedienteak. Guztiak, bat izan ezik, futbolarekin zerikusia zutenak. Erasoak, desordena publikoa, borrokak, irainak edo mehatxuak dira nagusi espedienteetan.

Datuok islatzen dutena gizonen arazoa dela azpimarratu zuen Zupiriak. Horrez gain, kirol esparruko indarkeriaz baino gehiago, futbolarekin lotutako “eraso fisiko zein hitzezkoez” hitz egin beharko litzatekeela adierazi zuen.

Hasi afizionatuetatik eta profesionaletaraino, futbolaren esparru osoan presente dagoen indarkeria dela jakinarazi du Zupiriak. Oinarrizko kiroletan ere, zeinetan haurrak diren futbol jokalariak, familiek, hezitzaileek eta ikusleek indarkeriazko egoerak normalizatzen dituztela azpimarratu du. Hala bada, adin txikikoen futbol jardunean bertan, kirolaren eginkizun hezitzailea alboratu eta lehiakortasuna nagusitzen da.

Horrez gain, testuinguru honetan emakumeek pairatzen duten indarkeria era izan da hizpide batzordean. Aldageletan, zelaian, kluben ekitaldietan erasoak ematen direla aipatu du sailburuak, sarri entrenatzaileak izanik erasotzaileak.

Egoera honen aurrean, Eusko Jaurlaritzak kirolean indarkeria ezabatzeko politikak bultzatuko dituela jakinarazi du: besteak beste, Euskal Futbol Federazioarekin lankidetzan, oinarrizko kirol eremuan ematen diren indarkeriazko adierazpenen datuak bildu eta “indarkeriaren kulturan” oinarritzen ez den harreman eredu berri bat bultzatzeko asmoa ere adierazi dute.