"Kalitatezko osasun publiko baten alde" milaka pertsona atera dira kalera Gasteizen, Bilbon eta Donostian. Osakidetzaren "egoera larria" salatu dute, eta Gotzone Sagardui Eusko Jaurlaritzako osasun sailburuaren dimisioa eskatu dute, "osasun sistema publikoaren hondatzearen erantzule nagusitzat" jota. Osasun Publikoaren Aldeko Herri Plataformek (OPA) deitu dituzte mobilizazioak, eta hamarnaka eragile sozial eta sindikal atxikitu dira.

OPAko kideek Osakidetzan gertatzen ari diren hainbat arazo aipatu dituzte: arreta guneen itxierak, ordutegien murrizketak, arreta presentziala lortzeko zailtasunak, telefonoz artatua izateko itxaronaldi luzeak, Lehen Arretaren kolapsoa eta horrek sortutako larrialdietako saturazioa edota espezialistekin hitzordua lortzeko eta ebakuntzak egiteko itxaron-zerrenda luzeak, besteak beste.

Salatu dute osasungintza pribatua ari direla indartzen "Osakidetza desegiten" ari diren bitartean. Hala, EAJ eta PSEri eskatu diete pribatizazio, desegite eta murrizketa politikak bertan behera uzteko.

Datozen grebak

Sindikatuek datozen egunetarako hainbat greba egun deitu dituzte. Aste honetan, ostegunerako, Arabako Landa Eremuan greba deialdia egin dute ELA, LAB, SATSE, SME, ESK, UGT, CCOO eta SAE sindikatuek, besteak beste, inguru horretan Osakidetza planteatzen ari den txandakatze sistemaren aurka eta langileen etengabeko kontratu partzialak salatzeko. Maiatzaren 19 eta 20rako, berriz, Osakidetza osoan deitu dituzte grebak sindikatu guztiek.