Sobiet Batasunekoak izandako hainbat herrialderen pribatizazio prozesuak bultzatu zituen De Grootek NDFko eta Munduko Bankuko arduradun zela, tartean Txekiako iparraldeko meatzeenak. Nazioarteko ardura postuak utzi eta gero Txekiako meatze horien jabe den finantza konpainiaren presidente bihurtu zen.

Sei urteko ikerketaren ostean Suitzako epaitegietako prokuradoreek ondorioztatu dute De Grootek eta beste sei txekiarrek finantza egitura konplexua sortu zutela 660 milioi euro Suitzako bankuetako ehunka kontutara eramateko.

Diruak Txekiako meatzeak kudeatzen dituen enpresan du jatorria. De Grootek 86 urte ditu egun eta bere kontrako auzibidea maiatzaren 13an hasi zen; baliteke epaiketa uda honetan izatea.

Rebelion.org webgunean auziari eta De Grooten ibilbideari buruzko informazio sakona dakarren artikulua idatzi du Éric Toussaint belgikarrak (Griselda Pinerok gaztelaniara itzulita).