Donald Trumpen administrazioak beste erabaki polemiko bat hartu du astearte honetan: AEBak NBEren Giza Eskubideen Batzordetik aterako direla iragarri du. Erabakiaren arrazoia: organo horrek maiz Israel kritikatu izan duela, palestinarren kontra egiten dituen politikengatik.

Nikki Haley AEBen ordezkariak honakoa adierazi du: “Urte honen hasieratik, iaz egin zuen bezala, Giza Eskubideen Batzordeak bost erresoluzio onartu ditu Israelen kontra, Ipar Korearen, Iranen eta Siriaren kontrakoak gehituta baino gehiago”. Haleyren arabera “neurriz kanpokoa” da Israelen aurkako jarrera hori eta adierazten du NBEren batzorde hori politikoki lerratuta dagoela.

“Giza Eskubideen Batzordeak eraso egin behar badie giza eskubideak babesten dituzten herrialdeei eta aldiz, giza eskubideen aurka egiten duten herrialdeak babestu, orduan Amerikak ez dio inolako sinesgarritasunik emango”, gaineratu du Haleyk.

Benjamin Netanyahu Israelgo lehen ministroak txalotu egin du AEBen erabakia Twitter bidez, esanez neurri honekin “nahikoa da” esaten zaiola behingoz NBEren Giza Eskubideen Batzordearen jarrerari.