Zergatik antolatu dituzue jardunaldiak?

Ezaguna da Donostiako etxebizitzaren merkatua oso bideratuta dagoela espekulazioan oinarritutako garapen ekonomikoa sustatzera, eta horren erakusgarri dira hiriko turistifikazioa eta gentrifikazioa. Historikoki Donostiak arazo estruktural hori izan du, eta horregatik, otsailean lantalde bat osatu genuen, beste hiriburu batzuetan alokairuaren inguruan egin diren lanketak gurera ekartzeko. Gainera, azken hilabeteotan ikusi dugu hirian nagusitasun handia irabazi dutela putre funtsek, eta ezinbestekoa iruditzen zaigu horren inguruko lanketa bat egitea.

Zeintzuk dira jardunaldien helburuak?

Bestalde, hainbat hilabete daramatzagu sindikatuaren bueltan lanean, baina oraindik ez diogu jendeari aurkeztu. Beraz, jardunaldi hauen helburuetako bat sindikatuaren aurkezpen ofiziala egitea da. Beste helburu bat da herritarrei aditzera ematea hirian etxebizitzarekin dauden arazoak, eta horregatik, Azorako kide bat eta Bentaberriko Blackstonen etxebizitzetako bizilagun bat ekarriko dugu, besteak beste.

Laburbilduz, hiru dira jardunaldietako helburuak: sindikatua aurkeztea, etxebizitzaren harira hirian dauden auziak ezagutaraztea eta beste esperientzietatik ikastea, kasu honetan, Kataluniako Sindicat de Llogateres sindikatuaren esperientziatik.

Nolakoak izango dira jardunaldiak?

Bi atal izango dituzte: ostiralekoa irekia izango da, eta hiriko hainbat kasuistika eta Kataluniako sindikatuen esperientzia ezagutuko ditugu. Larunbatekoa, aldiz, ikastaro itxiago bat izango da. Edonor joan daiteke, baina aldez aurretik izena eman beharra dago; Kataluniako adibidea jarraituta, aztertuko dugu Donostian nola antolatu behar dugun eta zein borroka molde garatu behar ditugun.

Nola ekarri daiteke Kataluniako esperientzia gurera?

Guri bi elementu nagusi interesatzen zaizkigu: maizterren sindikatu bat nola antolatu behar den ikastea eta borroka espazioen inguruan ikastea. Azken horretan, Katalunian jabe handiak identifikatu izan dituzte, euren aurkako borroka kolektiboak garatzeko. Era berean, legearen inguruko lanketa nola egin behar dugun aztertuko dugu.

Zer esango zenioke jendeari jardunaldietan parte hartzera animatzeko?

Hilabete batzuk daramatzagu Donostian hainbat problematika identifikatzen eta aholkularitza lana egiten. Hori areagotu egingo da datorren hilabeteetan, izan ere, iristen ari den krisian higiezinen sektorea izango da zigortuenetako bat, eta horren aurrean antolatu behar dugu.