Ikastolen Elkarteak ohartarazi du “aldebakarreko gobernantza” ahalbidetzen duela legearen “zehaztasun faltak”

  • Onartu berri den lege aurreproiektua “balekoa” eta “aurrerapausoa” dela adierazi dute ikastolek, baina zehaztapen faltari lotutako hainbat gabezia kritikatu dituzte. Eskatu dute denon artean eraikitzeko “etorkizuneko Euskal Hezkuntza Zerbitzu Publikoa”.

Euskarari dagokionez, "aurrerapausoak" bermatzeko neurriak eskatu ditu Ikastolen Elkarteak. Argazkia: Ikastolen Elkartea.

2023ko maiatzaren 09an - 13:47
Azken eguneraketa: 17:49

Ikastolen Elkarteak “balekotzat” jo du Araba, Bizkai eta Gipuzkoako Hezkuntza Lege aurreproiektua. Zuzendaritzako eta Artezkaritza Kontseiluko kideek asteartean prentsaren aurrean azaldu dute balorazioa, eta aurrekoarekiko hiru aurrerapauso nabarmendu dituzte. Lehenik, Euskal Hezkuntza Zerbitzu Publikoaren ideia lehen aldiz aipatu dela, ikastetxe publiko zein pribatuei baldintza batzuk betetzea eskatzen diena. Bigarrenik, “doakotasun erreala” bermatuko duela, pribatu zein publikoak finantzatuko dituelako: “Doakotasun bide honetan urratsak egiten hasi da Hezkuntza Saila, finantzaketa gehigarria emanda”. Hirugarrenik, aipatu dute euskararen inguruan aldaketa positiboak egon direla, hala nola irakasleek C1 eta DBHko ikasleek B2 maila lortzea sustatzea.

Zehaztasun falta

Dena den, lege aurreproiektuaren “gabeziak” ere mahaigaineratu dituzte, gehienak “legearen zehaztapen faltari” lotutakoak. Horrek sortu lezakeen arazo nagusia da “agindu eta dekretu bidezko gobernantza ahalbidetzen diola” Jaurlaritzari, Ikastolen Elkartearen esanetan. Alegia, zehaztapen horiek “aldebakarrez” erabakiko direla kritikatu dute, hezkuntza eragileei parte hartzeko aukera “zailtzen” dietelako. Elkarteak ohartarazi du “denon artean” eraiki behar dela “etorkizuneko Euskal Hezkuntza Zerbitzu Publikoa”.

Doakotasuna bermatzea aurrerapausotzat hartu badu ere, gehitu du hori lortzeko “epe zehatz batzuk ezarri eta lantalde bat eratzeko beharra” jaso behar duela legeak: “Ezingo da doakotasuna bermatu baliabide guztiak bideratu artean”.

Elkartearen beste kritiketako bat da “publiko-pribatu dikotomia juridikoa ez duela gainditzen”. Ikastolen Elkarteak salatu du legean ez dela kontuan hartzen kooperatibek duten kudeaketa eredua, eta ikastolen kasuan titulartasuna familiek eta langileek dutela. Legeak titulartasun pribatukoak eta administraziopekoak aipatzen ditu.

Euskara eta euskal kulturari, gehiago

Euskarari dagokionez, “gehiago” exijitu dute ikastolen ordezkariek. “Benetako murgiltze eredua” ezartzeko galdegin dute, eta horretarako zenbait bide proposatu dituzte, besteak beste, DBHko ikasleek B2 maila eskuratu dutela ziurtatzeko kanpo ebaluaketa egitea. Ikastetxeek euskara lehenetsiko dutela bermatzeko legean zehaztapenak falta direla diote.

Nazio ikuspegiari ere gabeziak ikusi dizkiote eta Euskal Herri osoko ikastetxeen arteko elkarlana indartzeko neurriak eskatu dituzte. “Ez ditugu inolaz ere alde batera utziko Iparraldean eta Nafarroan euskarazko irakaskuntzan ari diren ikastolekin ditugun konpromisoa eta lankidetza”, ziurtatu du Ikastolen Elkarteak. Bide horretan, euskal curriculuma oinarri izango duen sistema aldarrikatu dute, eta salatu legeak behin bakarrik izendatzen duela Euskal Curriculuma.


Kanal honetatik interesatuko zaizu: EAEko Hezkuntza Legea
Eraikuntza nazionala

Hezkuntza Lege berria, adostasunetik jaio behar zena, haserrean eta desakordioan onartu da. Publiko-pribatu auziak eta hizkuntza ereduek eragin dute akordio falta. Pena handia.

Horretan Espainiako ereduari jarraitzen diogu, EAEn ez garelako gai oinarri amankomun batzuk jarri... [+]


EHEko kideak legebiltzarreko atarira kateatzen saiatu dira, Hezkuntza Legea salatzeko

Gasteizko Legebiltzarraren aurrean egin dute protesta Euskal Herrian Euskarazeko kideek, “iraungita” dagoen Hezkuntza Legearen onarpena salatzeko. Goizeko 9:00etan elkarretaratzea burutu dute eta bi kide Legebiltzarreko atera kateatzen saiatu dira.


Oposizio guztia aurka duen Hezkuntza Legea onartu dute EAJ-PSEk

Iritsi da eguna: Eusko Legebiltzarrean ostegun goiz honetan onartu da soilik EAJ eta PSEk babesten duten Hezkuntza Legea. Legebiltzar atarian, Euskal Eskola Publikoaz Harrok eta Euskal Herrian Euskarazek protestak egin dituzte. Duela hogeita hamar urte onartu zen azken hezkuntza... [+]


Eguneraketa berriak daude