Glovoren kontra deklaratuko du LABek Bartzelonako fiskaltzaren aitzinean

  • Glovo eta haren gisako enpresek langileak autonomo gisa kontratatzen dituzte, oinarrizko langile eskubideak urratuz. Errealitate hori borrokatzen dabil Euskal Herrian LAB, eta fiskaltzak lekuko gisa deklaratzera deiturik, ostegun honetan sindikatuaren ordezkaritza bat egonen da Kataluniako hiriburuan.

Glovo enpresarentzat dabilen langile bat (Argazkia: Dos por Dos Kauldi Iriondo)

2023ko otsailaren 02an - 11:05
Azken eguneraketa: 12:05

Glovo gisako plataforma digitalen egonkortzea aurreikusita, sindikalismoak "erronka" bat duela uste du LABek. Iragan urrian bideratu prentsaurrekoan zehaztu zuten langile borroka horren beharra, ondoko bi helburuak finkatuz: lehenik, lege-iruzurra amaitzea eta lan-harremana besteren konturakoa dela aitortzea; eta, bestetik, lan-baldintzak arautzeko esparru bat ezartzea, Negoziazio Kolektiborako eskubidea betez.

Bide hori Euskal Herrian egiteaz gain, Kataluniara eramanen du otsailaren 2 honetan mezua: Bartzelonako epaitegietan "autonomo faltsuez" baliatzen den plataforma digital baten aurka abiatutako prozesu batean lekuko gisa deklaratzeko deitu dutelako sindikatua.

Gaur egun, langileek besteen konturako langile izaera onartua badute ere epai irmo edota ebazpen bidez, Glovok autonomoen eraentzan altan ematera behartzen ditu, eta ondorioz, erregimen orokor eta autonomoetan, bietan, daude alta emanda. Horrekin batera, enpresak ez dizkie oinarrizko eskubideak onartzen: oporrak, lanaldiak… Langileon eskubideen kontrako "delitu larri eta jarraituak" eta epai zein ebazpen administratiboei "entzungor" izaera deitoratuko du sindikatuak.

Azken isuna: 57 milioi eurokoa

Urtarrila bukaeran jaso du isun berri bat Espainiako Estatu mailakoa, Glovo enpresak: 57 milioi eurokoa. Gizarte Segurantzako Lan Ikuskaritzak, hasteko, 32,9 milioi euroko isuna jarri dio, 7.022 langileri Gizarte Segurantzan alta ez emateagatik. Hori horrela, langile horien kotizazio falta ere ordainarazi diote, beste 19 milioi euro. Horri bigarren isuna gehitu behar zaio, 813 atzerritar lan baimenik gabe enplegatzeagatik, 5,2 milioi euroko isuna jarri diote horregatik. Helegitea jartzeko asmoa plazaratu zuen berehala enpresak.

LABek ondoko mezua luzatu die Glovo gisako plataformentzat dabiltzan banatzaileei: "Langileen antolakuntzarekin dena delako posible, baita Glovo bezalako munstro bat ataka larrian jartzea ere. Euskal Herriko rider-ak LABen bulegoetara hurbiltzen jarraitzeko deia egiten dugu, geroz eta gehiago garelako eta horrek geldiezin egingo gaituelako".


Kanal honetatik interesatuko zaizu: Glovo
Riderren lan eskubideak bermatzen dituen direktibaren alde egin du Europar Batasunak

Frantziako Estatua eta Alemania izan dira aurka kokatu diren estatu bakarrak. Direktibaren lanketa 2021eko abenduan abiatu zuen Europak, baina trabak eta presioak tarteko, hiru urte baino gehiago behar izan ditu onespenak. Europako Parlamentuak bozketa berrestea falta da.


Riderren “lan-babes falta” eta “muturreko arriskuak" agerian utzi ditu ikerketa batek

Glovo, Just Eat eta Uber Eatseko janari banatzaileen %70-75ak paperik gabe lan egiten du EAEn, El Salto hedabideak Journalismfund Europe-rekin elkarlanean egindako ikerketa-erreportajearen arabera. Horrek asegururik gabe uzten ditu langileak lanean lesioren bat izanez gero.


Glovok bere riderrak espiatzen ditu, baita lanean ez daudenean ere

Langileak espiatzeaz gain, ikerketa batek ondorioztatu du enpresaren app-ak datu pertsonalak eta geolokalizazioak bidaltzen dituela.


Glovok 206 banatzaileren 248.000 euro ordaindu beharko dizkio Gizarte Segurantzari

Nafarroako Sozial Arloko 1. Epaitegiak atzera bota du Glovok 2022ko azaroko epaiari jarritako helegitea. Helegitearekin, Glovok banatzaileak ez direla haren enplegatu berretsi nahi zuen.


Ziclo-P: Glovoren alternatiba etikoa

Ziclo-P kooperatibako kide Leire Rodriguez Metropoli Forala saioan izan dugu hiri garraiobide jasangarriaz, solasean. Bizikleta erabiltzen dute haien banaketa lana egiteko.


Eguneraketa berriak daude