Elkarteak xedapen ofiziala jaso du eta baieztatu da aste batzuk lehenago Lazarraga elkarteari adierazi zitzaiona: 112.817,10 euro itzuli beharko ditu Gasteiz Antzokiaren proiektuaren harira jasotako dirulaguntzengatik. Elkarteak aurkeztutako zuriketan, udalari proposatua zion 50.487,48 euro itzultzea, proiektua prestatzen gastatu gabeko diru kopurua, alegia. Elkarteak prentsa-ohar bidez adierazi duenez, jakinarazpen honetan ez dira zalantzan jartzen elkarteak dirulaguntzaren zuriketan aurkeztutako fakturak eta ordainagiriak, hau da, elkarteak 2023an egindako gastuak eta diru-irteerak bere horretan onartzen dira.

Elkarteak nabarmendu du udalaren erabakiak kalte bikoitza eragingo diola, batetik, kulturgunea kudeatzeko jaso gabeko diru-kopurua dagoelako, eta bestetik, horri, itzultzeko eskatu duena gehitu behar zaiolako. Kulturgunea oraindik ez ireki izanak ondorio larriak izan dituela azaldu du elkarteak. Hala, aurreikusitako diru-sarrerak jasotzeko aukerarik ez du izan elkarteak. Hauek zerrendatu ditu: Sarreren salmentengatik eta izen emateengatik 31.776,00 euro; espazioen eta tabernaren lagapenengatik 6.000 euro; babesleengatik eta beste hitzarmenengatik 41.500,00 euro. Elkarteak dio denera 79.276,00 euro galdu dituela.

Elkartearen ustez, proiektuak ez du “aterabide handiegirik”, Lazarragak ezin duelako itzuli “ez duen dirua”, alegia, proiektuan “udalaren ezagutza eta baimenarekin gastatutako dirua”. Elkarlanean alternatibak bilatuko dituen aldebiko harremana eskatu du Lazarraga kultur elkarteak.

Oztopoz betetako bidea

2022ko ekainera bitartean, euskal kultur eskaintza Oihaneder Euskararen Etxean kudeatzen zuen Lazarraga elkarteak. Urte bereko abuzturako Gasteiz antzokiko lanak bukatuta zeuden eta 2023 urtearen hasieran ateak zabaltzekoa zen. Lazarraga elkartea zen hastekoa eraikina kudeatzen eta kultur programazioa antolatzen. Alabaina, eraikina ez dago prest, hainbat oztopo agertu dira bidean.