Zentral nuklear zaharrak miatzeko lanen programaren barruan, Civauxeko Zentral nuklearra itxita dago gaur egun, eta istripua proba lan horietan gertatu zen, uraren zirkuitua hozteaz arduratzen den gailu batek huts egin zuenean, beti ere EDFek emandako azalpenen arabera. Gailu horrek ez zuen jasan 200 baretako presio froga, eta ondorioz, lurrun txorrota batek ihes egin zuen, orduko 1,5 m3 ur kantitatea askatuz. Lurruna ura bihurtzen da hozten denean eta, konpainiak adierazi duenez, oraingoz 80 m3 jario erradiaktibo berreskuratu eta biltegiratu dira.

Zentraleko arduradunek diotenez, ez da zauritu edo erradiazio kutsaturik eta eraikuntza nuklearretik kanpo ez da kutsadura erradiaktiborik sumatu. Kutsadura jaso duen aretoan, ostera, langileek jasan dezaketen erradiazioaren 7,5 halako neurtu dira. Hala ere, segurtasun nuklearraz arduratzen diren teknikarien esanetan, aurrekaririk gabeko istripua izan da eta oso ongi aztertu beharko da zer gertatu den.

Iazko miaketa batean, halaber, presioa handitzean korrosio fenomeno bat ikusi zuten erreaktore horretan, baina EDFren arabera, oraingo istripua ez da gertatu soldadura bat hautsi delako. Zentral horrek bi erredaktore ditu, bata 1997an abiarazitakoa eta bestea 1999an. Miaketa lanen ondoren urtarrilean berrabiarazi behar zuten, baina istripu honek irekiera atzeratuko du.