Hainbat irudi proiektatu zituzten zentralean: hala nola, pitzadurak erreaktorean edota François Hollanderen irudia, "Hondamendiaren presidentea?" hitzez lagunduta. Sophia Majnoni Greenpeaceko ekintzen arduradunak azaldu duenez, "arazorik gabe" iritsi ziren "zona nuklearrera". Hondamendirik gerta ez dadin, "esku hartu dezala" eskatu dio Hollanderi.

Zentrala kudeatzen duen Electricité de France enpresa elektrikoak azpimarratu du ekologistek ez zutela lortu lekurik garrantzitsuenetan sartzea.

Tricastin Frantziako zentral nuklearrik "arriskutsuenetakoa" dela nabarmendu dute Greenpeacekoek, eta Fessenheimekoa ixtea bezain funtsezkoa dela hura ere gelditzea. Izan ere, Fessenheimekoa (herrialdeko zaharrena) ixteko asmoa du Hollandek, baina ez besterik.

Gertatutakoaren harira, Frantziako presidenteak labur azaldu du herrialdeak garrantzi handia ematen diola "segurtasun nuklearrari".

Gaur egun, 59 zentral nuklear ditu Franziak eta beste bat ari da eraikitzen. Energia nuklearrarekiko menpekotasun handiena duen herrialdea da munduan.