Herritarrez gain, entitateei ere galdetua zaie parte-hartzea, haiena "arigune" izendatuz. Azaroaren 18tik abenduaren 2ra iraganen da hirugarren edizioa, "Hitzez ekiteko garaia" lelopean.
"Arduraz, gogoz eta emozioz" lotu dira Ahobizi eta Belarriprest-ak batzen dituen ariketari antolatzaileak. Mezu hori zabaltzen dabiltza, azaroaren 18tik abenduaren 2ra iraganen den Euskaraldiaren hirugarren edizioa hurbiltzen ari zaigula. Herritarren izen ematea ireki zuten atzo, irailaren 28an, Bilboko Kafe Antzokian egindako ekitaldiarekin.
Entitateek –enpresa, sindikatu, elkarte eta bestelako egiturek– urriaren 31a arte dute "arigune" gisa izendatzeko haiena.
Erakunde publikoen eta gizarte eragileen arteko elkarlana azpimarratu zuen Eusko Jaurlaritzako Kultura eta Hizkuntza Politikako sailburu Bingen Zupiriak, eta funtsean, Euskaraldiak oinarrian duen elkarlan hori zuten lehen lerroan jarri beste hizlariek ere. Herritarrei inplikatzeko deia luzatu zien Kike Amonarriz Euskaltzaleen Topaguneko lehendakariak.
Hirugarren edizio honetan, erabileraren arloko "erronka ttipi" edo "handi" bat aukeratzeko eskatuko zaie herritarrei: "Lorpen txikiak behar ditugu. Zinez uste dugu lorpen asko gehituz joango garela gizartean euskararen presentzia handitzeko urratsak egiten".
Horra bi figuren konpromisoak zein diren, antolatzaileen arabera:
Ahobizi: "Euskaraz ulertzen duten guztiekin euskaraz egiten dut uneoro. Kideek euskaraz ulertzen ote duten ez dakidanean lehen hitzak, beti, euskaraz egiten ditut; euskaraz ulertzen badute, euskaraz jarraitzen dut. Batzuetan zaila izan arren, elkarrizketa elebidunetan ere euskarari eusten diot kideek ulertzen dutenean".
Belarriprest: "Aldiro erabakitzen dut euskaraz noiz eta norekin egin. Agian, beti ez dut euskaraz egingo ulertzen duten guztiekin, baina euskara dakitenek niri euskaraz hitz egitea nahi dut, eta horixe eskatzen diet modu esplizituan".
Antolatzaileen ustez hizkuntza ohituretan eraginkorra da Euskaraldia eta horregatik laugarren edizioa ere antolatzen ari dira. Hori bai, aurrekoak udazkenean egin dira eta hurrengoa udaberrian izango da.
Euskaraldia bukatzear da lerro hauek idazten ditudan orduan, oraindik bukaera argazkiak eskas dira. Ez da dudarik ederrak izanen direla, besta handi batean hartutakoen antzekoak.
Bizkitartean, artoski irakurri ditut, hemen edo beste zenbait agerkaritan, ni baino adituagoak... [+]
Hitzaldiak, prentsaurrekoak, elkarrizketak eta bilerak kontuan hartuta, egunean hiruzpalau hitzorduri erantzuten die egunotan Euskal Herriaren geografia luze-zabalean Kike Amonarrizek (Tolosa, 1961). Umoregilearen aldartearekin, komunikatzailearen argitasunaz, soziolinguistaren... [+]