Ezkerreko alderdiak biltzen dituen GUE/NGL taldeko lehendakari Gabriele Zimmerrek azaldu du presoen eskubide urraketaren inguruko ikerketa egitea dela bisitaren xedea, eztabaida politikoan parte hartzearen ideiari uko eginez. Horretarako, sakabanaketaren, preso gaixoek bizi duten egoeraren eta legegintza zein zigor-araudiaren inguruko lehen eskuko informazioa eskuratu nahi izan dute eurodiputatuek. Zimmerrek ez du sakabanaketa politikak dituen ondorioen inguruko kezka ezkutatu: “Presoek beren bizilekuetatik gertu bete behar dituzte zigorrak”.

Bestalde, Europako kontserbatzaile eta erreformisten taldeko kide Mark Demesmaekerren esanetan, giza eskubideen defentsa Europar Batasunaren zereginen artean dago, “bake proiektu bat” den neurrian. Elkarrizketak “interesgarriak eta emankorrak ari dira izaten”, gaineratu du. Egoera bera “konplexua” dela aitortu duen arren, Demesmaekerrek azpimarratu du orain arteko aktore guztiek “indarkeriaren gaitzespena eta giza eskubide guztien errespeturako nahia” dutela amankomunean.

Eurodiputatuak EAE eta Nafarroako legebiltzarretan izan dira, besteak beste, baina ez dute alderdi guztiekin hitz egiterik lortu. Eusko Legebiltzarrari dagokionez, PPk eta UPDk uko egin diote batzartzeari; eta Nafarroan, UPNk, PPNk eta PSNk. Baiona bisitatuko dute asteartean.

Etxeraten bisita oinarri

Euskal Herrian ematen ari diren elkarrizketek, Etxeratek 2015eko martxoan eginiko bisita dute oinarri. Orduan hitz egindakoak “kezka” sortu zuen zenbait eurodiputaturengan, Martina Anderson Sinn Feineko kideak aitortu duenez: “Preso eta beren familia zein ingurukoek pairatu behar izaten duten tratuak kezka piztu zuen guregan”.

Etxeraten bisitak korronte ideologiko ezberdineko alderdien interesa piztu zuen. Horren harira, Josep Maria Terricabras (ERC), Gabi Zimmer (Die Linke), Martina Anderson (Sinn Fein), Mark Demesmaeker (N-VA), Tatjana Zdanoka (LKS), Lidia Senra (AGE) eta Malin Bjorkek (Vansterpatiet) dira Euskal Herria bisitatu duten eurodiputatuak.