Espainiako errepublika plurinazional baten barnean Kataluniak konstituzio propioa izatea proposatuko du Catalunya en Comú-Podemek.  

Joan Mena alderdiko bozeramaileak Europa Press albiste agentziari eskainitako elkarrizketan adierazi duenez, “beste lurralde batzuekin subiranotasuna partekatzen duen lurralde batek izan behar duen borondateen gutuna da Kataluniako konstituzioa”.

Katalunian gauza asko aldatu behar direla eta horretarako errepublika plurinazional bat lortzeko prozesu konstituziogile bat abiatu nahi dutela gaineratu du Menak. Kataluniaren autodeterminazio eskubidea ere babestu du, Kataluniatik kanpo “kostu politikoak” eragiten dituela onartu duen arren.