Espainiako Barne Ministerioari egozten zaizkion jarduerak “amaituta leudekeela” azaldu dute Espainiako Auzitegi Nazionaleko administrazioarekiko auzien jurisdikzioko bosgarren salako magistratuek, eta ondorioz ikerketa bide hori itxita geratzen dela; ez du aurrera egingo Òmnium Cultural-ek, Herrialde Katalanetako Ikasleen Sindikatuak (SEPC) eta ERCko gaztediek (JERC) jarritako errekurtsoak, Kataluniako mugimendu independentistako gazteen eragileetan infiltratutako poliziaren harira jarritakoak, hain zuzen. Magistratuen arabera, salatutako gertaerak “egiazkoak izanez gero”, konstituzio-eskubide eta konstituzio-bermeen aurkako delituak izan litezke, eta zigor arloko jurisdikzioan ikertu beharko lirateke.

Halaber, argudiatu dute Bartzelonako 20., 24. eta 32. instrukzio-epaitegietan jada ikertzen ari direla gertakariak. Òmnium Cultural-ek Directa-ri jakinarazi dionez, "guztiz kontraesankorra" da Auzitegi Nazionalaren jarrera: "Fiskaltzak atzera bota du bide administratiboa, esanez bide penaletik ikertu beharko litzatekeela, baina, gero, ez dute presio egiteko inongo intentziorik, ikerketa eraginkor bat ireki dadin".

Bestalde, bosgarren aretoaren arabera infiltrazioak “amaituta legoke”, baina Omniumek ohartarazi du baieztapen hori ez dela "batere zehatza": “Barne Ministerioak aditzera eman zuen terrorismoaren aurkako estrategiaren barruko jarduera zela, eta inongo momentuan ez zuten ziurtatu iraganeko gauza zenik, dagoeneko egiten ez dena", gogorarazi dute. Magistratuek ez dute zehaztu zertan oinarritzen diren "jarduera amaituta legokeela" baieztatzeko.

Administrazio-bidea itxita, Auzitegi Nazionalak prozesuko kostuak ordaintzera zigortu ditu Òmnium, SEPC eta JERC elkarteak, eta bost eguneko epea eman die erabakia berraztertzeko errekurtsoa aurkezteko, Santander Bankuko kontu batean 25 euro sartu ostean. Directa hedabideari Òmniumek jakinarazi dionez, errekurtsoa jartzeko bideak aztertzen ari dira.

Polizia infiltratua argitara

Directa hedabide katalanaren ikerketa batek ekainean azaleratu zuen Espainiako Poliziak I.J.E.G agenteari NAN faltsu bat eman ziola "Marc Hernández Pons" izenarekin, eta horrela, polizia Kataluniako mugimendu independentistan infiltratu zela. Jarraipena egin zioten Directako kazetariek, eta honakoa atzeman zuten: 2020ko ekainean lur hartu zuen Marc Hernàndez delakoak Kataluniako aktibismoan. Parte hartu zuen lehen elkarretaratzea ekainaren 2an Bartzelonako Unibertsitateko plazan egin zen "bizitza kapitalaren aurretik" izenekoa izan zen. Ekainaren 22an Bartzelonan etxebizitza izateko eskubidearen aldeko mugimenduan sartu zen, Resistim al Gòtic asanbladan eta ekainaren 27an Lina Òdenako Casal Popularra desalojatzearen aurkako kale ekintzan parte hartu zuen. Hamabost egun geroago Bartzelonako Unibertsitateko Irakaskuntza fakultatean matrikula egin zuen. Baina Directak ezagutzera eman duenez, hau guztia gertatu baino bost hilabete lehenago bere identitate digitala lantzen hasi zen, Twitter eta Instagram sareetan Marc Hernàndez Pons-en izenean erabiltzaileak sortuz (@MarcHernandezP2 eta @maaarchp). Identitate faltsuarekin kontu korronte bat ere zabaldu zuen CaixaBanken. Prentsaurrekoak, manifestazioak, ekintzak eta grebetan parte hartu du. 2022ko hasieran Endavant-en sartzeko nahia agertu zuen, baina Herrialde Katalanetako Ikasleen Sindikatutik erantzun zioten dagoeneko espazio askotan militatzen zuela eta ez zuen bere helburua gauzatu.

David Bou Directako kazetariak ARGIAko "Marc txibatoa" iritzi-artikuluan aurreratu zuen ez zutela epaitegietan ezer argitzerik espero: "Harrapatu ditugula onartzea litzateke ametitzea baliabide publikoak bideratzen dituztela kolektiboak espiatzeko, borrokatzen direnak hezkuntza publikoaren alde, espekulazioaren aurka edo inor etxerik gabe gera ez dadin. Horiek dira Sindicat d 'Estudiants dels Països Catalans, Casal Popular Lina Òdena eta Resistim al Gòtic mugimenduen helburuak, haietan infiltratu zen agente bikoitza prozesu independentistaren aurkako Espainiako Epaitegi Gorenaren epaiaren ondoren. Hori guztia, Pegasus programa israeldarrarekin independentisten dozenaka telefono mugikorren interbentzioarekin paraleloan".